4-августка караган түнү Москва жана Ленинград облустары Украинанын дрон чабуулуна кабылганын жергиликтүү бийлик өкүлдөрү кабарлашты.
Москванын губернатору Андрей Воробьевдун айтымында, Чехов муниципалдык округундагы Новоселок өндүрүш аймагында 10 киши жабыркады. Жетөөнүн абалын дарыгерлер орточо, дагы бир кишиникин оор деп мүнөздөп жатышат.
Андан мурдараак аталган аймакта кеминде беш киши каза болгону, дагы алтоо жараат алганы, кампада өрт чыкканы кабарланган болчу.
Электр көмөк чордону, административдик имарат жана жеке турак жай зыянга учурады.
Чехов шаарында бутага Wildberries компаниясынын кампасы алынганын Astra басылмасы күбөлөргө таянып жазды. Ушундай эле маалыматты украиналык Exilenova+ Telegram каналы да жарыялады.
Ленинград облусунда да, губернатор Александр Дрозденко билдиргендей, кампа аймагына зыян келтирилди, бир адам жабыркады.
Wildberries компаниясынын басма сөз кызматы маркетплейстин Красный Бордогу логистикалык объектине чабуул жасалганын маалымдап, анда өрт чыкканын билдирди.
Компаниянын өкүлдөрү жабыркагандар жок экенин айтып, объекттеги кызматкерлер алдын ала эвакуацияланганын белгилешти.
Telegram каналдарында Красный Бордогу күйүп жаткан Wildberries кампасынын видеолору жарыяланды.
Украинанын Киев облусунун Бровары районунда украиналык Rozetka маркетплейсинин кампасына сокку урулду. Аталган компания 2-августка караган түнү кампага эки дрон тийгенин, жабыркагандар жок экенин кабарлады.
1-августта да компаниянын кампасына чабуулда бир киши каза таап, жетөө жараат алган.
2-августта Харьковдогу Коротыч кыштагында почта терминалы соккуга кабылды. Харьков облустук аскердик администрациясынын башчысы Олег Синегубовдун билдирүүсүндө, жүк ташуучу машинелер, контейнер жана башка жабдыктар күйүп кетти. Жергиликтүү Телеграм каналдар сөз "Новая почтанын" терминалы тууралуу жүрүп жатканын билдиришти. Соккудан бир киши каза болгон.
Орусиянын армиясы 2-августка оогон түнү Украинаны жалпы 133 дрон менен аткылаган. Украинанын армиясы 109 дрон атып түшүрүлгөнүн, 24ү 19 жерге тийгенин маалымдаган.
Ал эми жекшемби күндүз Орусия Запорожьени эки ирет башкарылуучу авиабомба менен аткылады. Запорожье облустук аскердик администрациясынын жетекчиси Иван Федоровдун маалыматына караганда, жер тамга тийген соккуда бир киши каза таап, экөө жараат алды. Шаарда көп кабаттуу турак жайга авиабомба тийип, 30дан ашык киши жараат алды.
Федоров Запорожье аймагында жалпы сегиз авиабомба ташталганын кошумчалады.
Запорожье дээрлик күн сайын Орусиянын авибомбалык соккусуна кабылып келатат.
20-июлдагы беш кабаттуу үйгө чабуулда 11 жаштагы кыз каза болгон. Андан кийинки күнү көп кабаттуу турак жайга сокку урулганда үч кишинин өмүрү кыйылган.
Украинанын учкучсуз учактары 2-августта Орусиянын Wildberries компаниясынын Самара шаарынын четиндеги Новосемейкинов кыштаганда жайгашкан кампасына сокку урду.
Соккудан кийин кампа өрттөнүп жатат.
Чабуул жана өрт болгонун Wildberries компаниясы жана Самара облусунун губернатору Вячеслав Федорищев ырастады.
Украиналык Supernova+ жана Еxilenova+ Телеграм каналдары жергиликтүү тургундардын кыштакта кампага соккудан кийин коюу түтүн асманга көтөрүлүп, күйүп жатканы тартылган видео-сүрөттөрдү жарыялады.
Бул июлдун ортосунан бери украиналык дрондордун соккусуна кабылган маркетплейстин тогузунчу кампасы.
Орусияда 1-августта эртең менен Уфа шаарына украиналык учкучсуз аппараттар чабуул жасаганын Башкырстандын башчысы Радий Хабиров билдирди:
"Уфага багытталган кезектеги дрон чабуулунун мизин кайтардык. Атып түшүрүлгөн дрондун кулаган сыныктарынан улам өнөр жай аймагында түтүн пайда болду".
Украиналык мониторинг каналдары шаардагы өнөр жай аймагында чыккан бир нече өрттүн сүрөттөрүн жана видеолорун жарыялашты.
"Аспекты" басылмасы окуя шаардын түндүк өнөр жай аймагында болгонун жазды:
"Жергиликтүү убакыт боюнча саат 10:30 чамасында мунай иштетүүчү заводдордун үстүнөн жарылууга окшогон үндөр угулуп, коюу түтүн чыга баштаган", - деп маалымдады басылма.
Башкырстанда дрон коркунучу тууралуу ишемби күнү жергиликтүү убакыт боюнча саат 09:35те жарыяланган. Ошол эле учурда Орусиянын Федералдык аба транспорт агенттиги (Росавиация) Уфа аэропортунун иши убактылуу токтотулганын билдирген.
Astra басылмасынын OSINT аналитиги өрттүн сүрөттөрү менен видеолорун талдап чыгып, кара түтүн "Башнефть-Уфанефтехим" мунай иштетүүчү заводун каптаганын аныктаган.
Astra басылмасынын маалыматына ылайык, бул ишкана жылына 8,2 миллион тоннага чейин мунайды кайра иштетет. Ошондой эле мотор майын, мунай коксун, суюлтулган газ, күкүрт жана жыт берүүчү углеводороддорду чыгарат.
"Башнефть" компаниясы түндүк өнөр жай аймагында бири-бирине абдан жакын жайгашкан үч мунай иштетүүчү: "Башнефть-Уфанефтехим", "Башнефть-Новойл" жана "Башнефть-УНПЗ" заводдорун башкарат.
Уфадагы мунай иштетүүчү заводдор буга чейин чабуулга 25-июнда кабылган.
Украинанын Орусиядагы мунай иштетүүчү ишканаларга соккулары уланууда. Мунун кесепетинен Орусияда күйүүчү май тартыштыгы башталган.
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып калат.