Жекшембиге караган түндө Санкт-Петербургдун түштүгүндөгү Колпин шоссесинде жайгашкан кампага дрон сыныгы тийип, өрт чыкты. 82 миң чарчы метрге жеткен өрттү өчүрүү иштери жүрүп жатканын Орусиянын Өзгөчө кырдаалдар министрлиги (ӨКМ) билдирди. Өрт чыккан кампа Ozon компаниясынын кампасынан болжол менен 350 метр алыстыкта жайгашкан.
Ошол эле учурда Оренбург шаарындагы Ozon компаниясынын логистикалык комплексинин аймагына дрондун сыныктары түшкөнүн шаар мэри Альберт Юмадилов кабарлады. Маалыматка ылайык, анын кесепетинен чыккан өрт тез арада өчүрүлгөн. Кампадан 300 кызматкер эвакуацияланган.
Ozon компаниясынын Оренбургдагы кампасы 2024-жылы августта ачылган. Анын аянты 40 миң чарчы метрди түзөт. Кампанын аянтын эки эсе кеңейтүү пландалып жатканы айтылды.
Бул окуялардын алдында, 22-августта, Украина күчтөрү Орусиянын Самара облусундагы Ozon компаниясынын ири хабына сокку урганы кабарланган.
Украина тарап буга чейин Wildberries кампаларына жасалган чабуулдардан кийин Ozon объектилери бутага алынарын билдирген.
Украин аскерлеринин дрон чабуулунан Орусиянын Краснодар крайындагы Ейск портунда бир үй-бүлөнүн эки баласы мерт кетти. Дрон сыныгы жер үйгө түшүп, дагы эки адам ооруканага жеткирилген. Краснодар ыкчам тобу кийинчерээк алардын бири ооруканадан көз жумганын кабарлады.
"Дрон түшкөн жер үйдө ыкчам кызматтар иштеп жатат. Учкучсуз учактардын сыныктары порт аймагындагы ишканага да түшкөн, азыр ал жакта өрттү өчүрүп жатышат. Бардык жабыркагандарга зарыл жардамдар берилет", – деп жазды Кондратьев.
Мурдараак Ейск портуна урулган сокку тууралуу РБК-Украина жазган. Украиналык Supernova+ жана Exilenova+ телеграм каналдары Ейск портунан чыгып жаткан түтүндүн сүрөтүн жарыялашты, такталбаган маалыматтарга караганда, портто кемеге чабуул болгон.
Украинанын Башкы штабы Ейск портуна сокку урулганын кийинчерээк ырастады. Маалыматта бутага порттогу мунай куюучу комплекстин күйүүчү май резервуарлары алынганы айтылган.
Украин куралдуу күчтөрү маалымдашынча, мунай куюучу комплекс Орусия армиясынын муктаждыктары үчүн пайдаланылат.
22-августка караган түндө Орусиянын аймактарында, анын ичинде Волгоград, Ростов облустарынын, Краснодар крайынын, Азов жана Кара деңиздин үстүнөн 457 учкучсуз учак атып түшүрүлгөнүн орус Коргоо министрлиги кабарлады. Ростовдо токой өрттөнгөн.
Жума жана ишембиге караган түндө Орусиянын Украинага ракета жана дрондор менен соккусунда жыйырмага чукул адам мерт кетти. Кривой Рогдо 21-августта кечинде эки соккудан кеминде 16 адам каза болуп, 130 адам жараат алды. Урандыларды тазалоо иштери уланууда. Дагы тогуз адам, анын ичинде эки бала дайынсыз экени айтылууда.
Украинанын бир катар аймактарына жуманын кечинде жана ишембиге караган түнү Орусия ракеталар жана дрондор менен сокку урду. Акыркы маалыматтар боюнча, эң көп адам Кривой Рогдогу соода борборуна жасалган соккудан каза болду.
Днепропетровск облусунун администрация башчысы Александр Ганжанын маалыматына караганда, Кривой Рогдо 21-августта кечинде эки соккудан кеминде 16 адам каза болуп, 130 адам жараат алды. Урандыларды тазалоо иштери уланууда. Дагы тогуз адам дайынсыз болууда, алардын экөө балдар. Ооруканага жеткирилген 63 адамдын 29нун абалы оор деп бааланууда. Жабыркагандардын арасында 16 жаштагы кыз бар экени маалымдалды.
Запорожье облусунда да адам каза болду. Облустук администрациянын башчысы Иван Федоровдун айтымында, түн ичинде облустун борборуна жакын жайгашкан Кушугум кыштагына дрон менен сокку урулду. Анын кесепетинен бир эркек киши каза болду, дагы төрт киши жараат алды.
Киевде да сокку урулуп, Дарницкий районундагы кампа өрттөндү. Баштапкы маалымат боюнча, бир адам каза болуп, бир нечеси жараат алды. Украинанын Куралдуу күчтөрүнүн Аба күчтөрү Киевге бир нече баллистикалык ракета жана реактивдүү «Бандероль» тибиндеги дрондор менен сокку урулганын билдирди.
Ал эми Одесса облусун түн ичинде ракета жана дрон чабуулуна кабылды. Украинанын Аба күчтөрү Кара деңиз тараптан жана чыгыштан Одесса, Измаил, Черноморск, Южный жана башка калктуу конуштарга карай көптөгөн сокку уруучу каражаттар багытталганын эскерткен.
«Суспільне» басылмасы Одесса жана Измаил шаарларында жарылуу болгонун кабарлады. Жергиликтүү Telegram каналдар аймактагы объекттердин биринде өрт чыкканын жана айрым жерлерде электр энергиясы өчүрүлгөнүн билдирүүдө.
Соңку апталарда Украина Орусиянын аба соккуларынан жакшы коргоно албай, жайкын тургундар арасында курмандыктар саны өсүүдө. Украин президенти Владимир Зеленский АКШда өндүрүлгөн Patriot абадан коргонуу системалары үчүн ракеталары түгөнүп калганын жана аскерлер Орусиянын баллистикалык ракеталарын атып түшүрө албай жатканын билдирген.
Орусиянын Самара облусундагы Ozon кампасы 22-августта учкучсуз учуучу аппараттардын соккусуна кабылды, жабыркагандар бар экенин губернатор билдирди. Маркетплейстин маалыматына караганда, ал жерде өрт чыкты. Бул Украинанын Куралдуу күчтөрү Ozon компаниясынын ири объектине урган алгачкы соккусу. Ушул эле аймакта мунайды кайра иштетүүчү завод да күйүп жатат.
Украинанын Куралдуу күчтөрү 22-август, ишембиге караган түнү Самара облусунда маркетплейс Ozon компаниясынын логистикалык комплексине жана «өнөр жай ишканаларынын бирине» учкучсуз учуучу аппараттар менен сокку урганын аймактын губернатору Вячеслав Федорищев өзүнүн Telegram каналында билдирди. Анын айтымында, бир нече адам жабыркап, алардын баарына медициналык жардам көрсөтүлүп жатат.
Ozon компаниясынын Самара облусунун Чапаевск шаарында жайгашкан логистикалык комплекси Поволжьедеги эң ири объектилеринин бири болуп саналат. Анын аянты 135 миң чарчы метрди түзөт.
Компаниянын өкүлдөрү Telegram каналында дрон чабуулу болгонун ырастап, натыйжада кампада өрт чыкканын билдиришти.
«Бардык системалар штаттык режимде иштеп, биз бир нече мүнөттүн ичинде 500дөн ашык кызматкерди эвакуацияладык. Ошого карабастан, тилекке каршы, жабыркагандар бар», — деп айтылды компаниянын билдирүүсүндө.
Ozon өкүлдөрү кампадагы иш белгисиз мөөнөткө токтотулганын белгилешти. Ал жерде жайгашкан товарлар маркетплейстин сайтынан убактылуу жашырылды, ал эми ошол кампадан жеткирилиши керек болгон буйрутмалар жокко чыгарылат.
«Коопсуздук максатында сатуучулардын товар жеткирүүлөрүн да убактылуу кабыл албайбыз», — деп айтылды билдирүүдө.
Буга чейин украиналык дрондор Орусиянын башка маркетплейси — Wildberries компаниясынын кампаларына жана логистикалык борборлоруна бир нече жолу чабуул жасаган.
Июль айынын аягында Татарстандагы Ozon кампасы да дрон соккусуна кабылган, бирок ал учурда компания кампага зыян келтирилбегенин билдирген.
Astra Telegram каналы билдиргендей, Чапаевск шаарындагы Ozon комплексинен болжол менен бир чакырым алыстыкта «Промсинтез» жана «Полимер» аттуу эки коргонуу ишканасы жайгашкан.
Мурда жарылуучу зат, курал-жарак жана ок-дары чыгарган бул эки завод тең украиналык ракеталардын жана дрондордун соккуларына кабылган.
Ошол эле учурда украиналык мониторинг жүргүзгөн Exilenova+ Telegram каналы 22-августка караган түнү Новокуйбышевск мунайды кайра иштетүүчү заводунун жанында тартылганы айтылган сүрөттөрдү жана видеолорду жарыялады. Кадрларда асманга көтөрүлгөн түтүн көрүнөт.
Astra каналынын аналитиктери да дрон чабуулунан кийин мамлекеттик «Роснефть» компаниясына таандык ишкананын аймагында өрт чыккан деген тыянакка келишти.
Буга чейин бул мунайды кайра иштетүүчү заводго дрондор бир нече жолу чабуул жасап, анын айынан заводдун иши убактылуу токтотулган.
Орусия коңшусу Украинага каршы толук масштабдуу согуш ачып, анын аймагын күн сайын дрон жана ракета менен аткылап келатканына бешинчи жыл болуп баратат. Соңку жылдары Орусиянын өзүнүн аймагы да бутага көп алынууда. Украина Орусиядагы чабуулдарга адатта комментарий бербейт, болгону, Москванын согуш машинасын токтотуу үчүн анын мунай жана аскердик продукция чыгаруучу ишканаларын жарактан чыгаруу керек деп эсептей турганын айтып келет.