Украинанын чыгышындагы өздөрүн "Донецк жана Луганск элдик республикалары" деп атап алган жикчил түзүмдөр көзөмөлдөгөн аймактарда Европадагы коопсуздук жана кызматташтык уюмунун бир нече кызматкери кармалды. Бул маалыматты баш кеңсеси Венада жайгашкан уюм 23-апрелде ырастап, кызматкерлерин бошотуу үчүн бардык мүмкүнчүлүктөрдү караштырып жатканын билдирди.
"ЕККУ Донецк жана Луганскиде атайын мониторинг жүргүзүү тобунун бир нече өкүлүнүн эркиндиги чектелгенине терең тынчсызданууда", - деп айтылат уюмдун Твиттердеги билдирүүсүндө.
ЕККУнун басма сөз катчысы Донбасста канча кызматкери ким тарабынан кармалганын так айтуудан баш тартты. Бул уюм март айында 500дөй байкоочуларын Украинадан чыгарып кеткен болчу.
Украинанын президенти Владимир Зеленский 24-апрелде АКШнын мамлекеттик катчысы Энтони Блинкен жана коргоо министри Ллойд Остин менен жолукту. Алар Орусия Украинага согуш ачкандан бери биринчи жолу Киевге барган Кошмо Штаттарынын жогорку жетекчилери болуп калды.
Азырынча жолугушуулардын жыйынтыгы тууралуу маалымат бериле элек.
Зеленский АКШнын жогорку жетекчилеринин сапарын утурлай бул сүйлөшүүлөрдөн курал-жаракка байланыштуу конкреттүү жыйынтыкты күтүп жатканын белгилеген.
Орусия Украинага басып киргенине эки ай болду. Москва менен сүйлөшүүлөрдө украин делегациясын жетектеген, украин президентинин кеңешчиси Михаил Подоляк жекшемби күнү билдиргендей, орус күчтөрү Мариуполь шаарындагы украин күчтөрүнүн акыркы чордонуна айланган "Азовсталь" заводун аткылоону улантып жатат. Подоляк Москваны Пасха майрамына байланыштуу ок атышууну токтотууга чакырды.
Буга чейин орус президенти Владимир Путин "Азовсталь" заводуна чабуул коюуну токтотууну, бирок өндүрүштүк жайдын айлана-тегерегин "чымын учуп өтпөгүдөй кылып бөгөттөөнү" буюрган.
Орусиянын беларус жана украин чек араларына жакын жайгашкан Брянск шаарында "Транснефть Брянск Дружба" деп аталган мунай базасы өрттөндү. Бул тууралуу өлкөнүн Өзгөчө кырдаалдар министрлигинин басма сөз кызматы кабарлады.
Баштапкы маалыматтарга ылайык, жабыр тарткандар жок. Өрткө байланыштуу жайкын тургундар эвакуацияланбайт. Окуянын себептери аныктала элек. Мунай базага ээлик кылган "Транснефть-Дружба" компаниясы билдирүү тарата элек.
Мунай базасында өрт чыкканы тууралуу маалымат дүйшөмбүгө караган түнү тараган. Кийинчерээк "Интерфакс" жана “РИА Новости” маалымат агенттиктери өз булактарына таянуу менен шаардын башка аймагындагы мунай базаны да өрт чалганын жазды. Таңга маал чыккан экинчи өрт 10 миң куб метр дизель отунун сактаган кампаны каптаганы маалым болду.
Бул арада украиналык жалпыга маалымдоо каражаттары Брянскта ок-дары сактоочу кампа өрттөнгөнүн жазышты. Муну менен катар бул өрттөргө жарылуулар себеп болгону кабарланды. Буга байланыштуу видео жазуулар да жарыяланды.
Брянск шаары Орусиянын Брянск облусунун борбору болуп саналат. Калаа ок атышуу уланып жаткан Украинанын чек арасынан 100 чакырым алыстыкта жайгашкан. Облус жетекчилиги 25-апрелден бери Украина тараптын аткылоосунан жүздөн ашык турак-жай жана он чакты жайкын тургун жабыр тартканын билдирген. Мурдараак Орусиянын Белгород облусунун администрациясы да аймактагы мунай базаларды украин тарап аткылады деп айыптаган. Украин бийлиги муну ырастаган эмес.
"Транснефть-Дружба" компаниясы - Орусиянын мамлекеттик "Транснефть” мунай өндүрүүчү корпорациясынын туунду ишканасы. Ал Орусиядан Европага мунай жеткирүүчү “Дружба” куурларына ээлик кылат.
Орусиянын Коргоо министрлиги бүгүн, 25-апрелде "Азовсталь" заводундагы жайкын тургундарды чыгарып кетүүгө гуманитардык коридор ачууга убада берди.
Министрликтин басма сөз кызматы билдиргендей, коридор жергиликтүү убакыт менен саат 14:00дө ачылат. Буга чейин украин тарап "Азовсталда" миңге жакын жайкын тургун бар экенин билдирген.