Орусия: "Азовсталдан" 959 украиналык жоокер чыгарылды
Орусиянын Коргоо министрлигинин өкүлү Игорь Конашенковдун расмий билдирүүсүндө алардын 80и жарадар болгону айтылат.
Мариуполду коргогон аскерлердин тагдыры кандай чечилери азырынча белгисиз. Украина аларды туткунда турган орус аскерлери менен алмашууну каалайт.
Орусиянын Мамлекеттик Думасы шаршембиде "улутчул кылмышкерлерди алмашууга" тыюу салган токтомдун долбоорун карамай болушкан. 17-майда Орусиянын Башкы прокуратурасы украиналык "Азов" полкун террордук уюм катары таануусун жана өлкө аймагында анын ишмердигине тыюу салууну өтүнүп Жогорку сотко кайрылганы белгилүү болду.
Батыш Украинанын унун дүйнөлүк рынокко чыгарууга жардам берет
Кошмо штаттары Батыш өлкөлөрү менен бирге унду жана жүгөрүнү дүйнөлүк рынокко чыгарууда Украинага жардам берүүнү пландап жатат. Орусия Украинанын портторуна кол салгандан кийин жабык турган кампалардагы товарларды чыгаруу жолдору каралып жатканын СNN өздүк булактарына таянып жазды.
Ыңгайлуу вариант катары темир жол, деңиз жана аба аркылуу ташуу каралып жатканын басылманын маектеши билдирген.
Путин менен Лавровдун Канадага кирүүсүнө тыюу салынды
Канада Украинадагы согушка байланыштуу Орусия президенти Владимир Путинди, тышкы иштер министри Сергей Лавровду жана коргоо министри Сергей Шойгуну "кара тизмеге" киргизди. Эми алар жана үй-бүлө мүчөлөрү Канадага кире албай турганын коомдук коопсуздук министри Марко Мендичино билдирди.
Мамдепартамент Украинадагы согуш кылмыштарын далилдеген фактыларды чогултат
АКШнын Мамлекеттик департаменти орус аскерлери Украинада жасаган согуш кылмыштарын, башка кыянат иштерин далилдеген фактыларды чогултуу жана анализдөө программасын баштады. Анын алкагында ачык булактардан алынган, анын ичинде спутниктен тартылган сүрөттөр, социалдык тармактарда жарыяланган далилдер документтештирилет, текшерилет жана таратылат. Алардын негизинде Орусияны жоопко тартуу максаты коюлуп жатат. Бул тууралуу Мамлекеттик департаменттин 17-майдагы билдирүүсүндө айтылат.