Украинанын куралдуу күчтөрү Харьков облусундагы Терновая айылында Орусиянын чек арасына жеткенин билдирди. Бул тууралуу видеону президенттин кеңсесинин башчысы Андрей Ермак Телеграм-каналына жарыялады.
Зеленский: Орусия энергетикалык инфраструктураларга сокку урууда
Украинанын президенти Владимир Зеленский 12-сентябрда кечинде жасаган билдирүүсүндө Орусия Украинанын энергетикалык инфраструктураларын бутага алууну улантып жатканын айтты. Ал анын кесепетинен жүз миңдеген адам, оорукана жана мектептер электр жарыгысыз калганын билдирип, мындай чабуулдар дагы болушу мүмкүн экенин эскертти. Владимир Зеленский орус аскерлери сокку урган энергетикалык инфраструктуралардын Украинанын куралдуу күчтөрүнө тиешеси жок экенин кошумчалап, акыркы окуяларды Орусиянын алсыздыгы катары баалады.
“Жарымы каза болуп, бир бөлүгү туткунга түшүптүр”.
Орусия Кыргызстандагы “Кант” авиабазасы аркылуу Украинадагы согушка өз аскерлерин жибергени белгилүү болду. “Азаттык” радиосу согуш башталганга чейин баш калаа Бишкектен 20 чакырым жерде турган орус базасында Тывадан келген ондогон аскер кызмат өтөгөнүн, алардын бир бөлүгү кийинчерээк Украинада согушта каза тапканын тактады. Жергиликтүү тургундар Орусия Украинага басып киргенден көп өтпөй “Канттагы” базада баштагыдай активдүүлүк азайганын байкашкан.
Тажикстан: Украинада уруш башталганы орус базасында аскер азайды
Журналисттер топтогон маалыматка караганда, 201-дивизиядан Украинага миңден 1500гө чейин аскер жана офицер жөнөтүлгөн. 27-августта бул базада кызмат өтөгөн, аты-жөнүн айтуудан чочулаган жоокер "жакынкы күндөрү дагы 600 кишини" согушка алып кетерин айтып берди.
