Түркиянын Конья шаарында өтүп жаткан V Ислам шериктештиги оюндарында кыргызстандык спортчу Роман Петров фехтование боюнча алтын медал тагынды.
Дене тарбия жана спорт департаментинин маалыматына караганда, Петров 15-августта финалда азербайжандык Руслан Хасанов менен беттешип, 15:11 эсебинде жеңишке жетти.
Соңку жыйынтыктар боюнча V Ислам шериктештиги оюндарында Кыргызстандын спортчуларында жети алтын, алты күмүш жана жети коло байге бар. Медалдар көрсөткүч боюнча Кыргызстан азыр 9-орунда бара жатат. Сап башында Түркия, Өзбекстан жана Иран турат.
Түркиялыктар 90 алтын, 81 күмүш, 63 коло байге алышкан. 2-катардагы Өзбекстанда 40 алтын, 28 күмүш жана 44 коло бар. Ирандын спортчулары 37 алтын, 31 күмүш, 42 коло байге менен 3-орунга чыкты.
Бешинчи жолу өтүп жаткан оюндарга 56 мамлекеттен 4 миңдей спортчу катышып, спорттун 20 түрүнөн таймашууда. Кыргызстандан жүздөн ашык спортчу барды. Мелдештер 18-августка чейин уланат. (ECh)
Facebook шеринеси