Линктер

ЧУКУЛ КАБАР!
3-Август, 2021 шейшемби, Бишкек убактысы 19:41

Маркум Жамал Сейдакматованын сөөгү "Ала-Арча" көрүстөнүнө коюлат


Жамал Сейдакматова.

Кыргыздын чыгаан театр жана кино өнөрпозу, Кыргыз Республикасынын эл артисти, маркум Жамал Сейдакматованы акыркы сапарга узатуу зыйнаты 17-февралда саат 10:00до Бишкек шаарындагы Абдылас Малдыбаев атындагы опера жана балет театрында өтөт.

Анын сөөгү Бишкектеги "Ала-Арча" көрүстөнүнө коюлары кабарланды.

16-февралда түнкү саат үчтө Кыргыз Республикасынын эл артисти Жамал Сейдакматова 82 жаш курагында оорудан көз жумган.

Жамал Сейдакматова 1939-жылы Ысык-Көлдүн Темир айылында туулган. 1957-жылдан тартып Т.Абдумомунов атындагы Кыргыз улуттук академиялык драма театрында эмгектенген. Киного 1958-жылдан тартып тартыла баштаган.

Актриса 1989-жылы биринчи болуп "Туңгуч" жеке театрын ачып, анын көркөм жетекчиси катары ишин ырааттуу уланткан.

1970-жылы ага Кыргыз ССРинин эмгек сиңирген артисткасы, 1976-жылы Кыргыз ССРинин эл артисти наамы берилген. Токтогул атындагы мамлекеттик сыйлыкты Жамал Сейдакматова 1986-жылы алган.

Ал эми 2003-жылы үчүнчү даражадагы, 2019-жылы экинчи даражадагы «Манас» ордени ыйгарылган.

Жамал Сейдакматова театрга 1957-жылы келип кирип, 60 жылдан ашуун өмүрүн кино жана театрга арнаган.

Ал «Акбаранын көз жашы», «Караш-Караш окуясы», «Отко таазим», «Мен - Тянь-Шань», «Эрте жаздагы турналар», «Ак илбирстин тукуму», «Толкундар жээкте өлүшөт», «Курманжан датка» сыяктуу бир катар кинотасмаларда, жүздөгөн спектаклдерде ар түрдүү ролдорду жогорку чеберчиликте жараткан. (TSh)

XS
SM
MD
LG