Линктер

ЧУКУЛ КАБАР!
11-Май, 2021 шейшемби, Бишкек убактысы 17:38

Коженттеги Кытай компаниясына нааразылык


Тажикстан, Кожент шаары.

Тажикстандын Кожент шаарынын ондогон тургундары 13-апрелде бузулган үйлөрүнүн ордун Кытай компаниясынан кайтарып алууну талап кылышты. Буга байланыштуу өздөрүн жабырлануучу катары эсептеген 20 чакты тургун шаардык мэриянын алдына митингге чыгышты. Жергиликтүү бийлик үйлөрү бузулган жашоочулар өздөрү башка жактан сунушталган батирлерди алууга макул болбой жатканын жүйө келтирди.

Коженттеги кытайлык “Husnoro” курулуш компаниясы 2015-жылы көп кабаттуу үй куруу үчүн шаардын Рахмон Набиев көчөсүндөгү 32 жеке турак үйдү бузган. Анын ордуна бул жашоочуларга жаңы курула турган көп кабаттуу үйдөн батирлер берилмек. Бирок кийин курулуш компаниясы бул долбоордон баш тарткан.

Митингге чыккандардын бири Рафоат Хашимова буларды айтты:

“Жаңы курулган үйлөр президент келгенде, 10-апрелде пайдаланууга берилиши керек эле. Биз балдарыбыз, неберелерибиз менен бирге үмүттөнүп жатканбыз. Бардыгы чалып, эмнеге батирлерди албай калганыбызды сурашты. Биз аябай кыжалат болдук”.

Митингге чыккан бул үй-бүлөлөр беш жылдан бери ижарага алынган үйлөрдү түнөк кылышууда. Ал эми алардын ижара акылары Коженттин шаардык бюджетинен төлөнөт. Бирок аларды жаңы үйлөргө жайгаштыруу кечиккен сайын үйлөрү бузулуп кеткен бул жашоочулар тынчсыздана башташты.

Коженттин үйгө кезекте турган башка бир тургуну Рохат Бобожанова буларды билдирди:

“Алты жылдан бери ар кимдин эшигин жыртып жүрөбүз. Бул аралыкта үч жолу үй котордук. Ушул бузулган үйүмдүн айынан ооруп да калдым. Азыр эки уулум, неберелерим менен ижарага алган үйдө турам. Үйдүн айынан чыр-чатак көп”.

Коженттин мэри Фирдавс Шарифзода 9-февралдагы басма сөз жыйынында “Кытай шаарчасы” курулуш долбоорунун айынан калаанын чок ортосундагы үйлөрү бузулган тургундар марттын аягына чейин турак жай менен камсыздаларын айткан.

Жергиликтүү бийлик Коженттин башка жагынан 9 кабаттуу үй курулуп бүтүп, жакында тапшырыла турганын билдирген. Ошол көп кабат үйдөн аталган жабырлануучу үй-бүлөлөргө батирлер бөлүштүрө турганы мурда кабарланган.

13-апрелде Кожент мэриясынын өкүлү Юсуфзод мындай деди:

“Бул жерде маселе - жашоочулар өздөрү сунушталган үйлөргө макул болбой жатышат. Айрыкча биринчи, экинчи жана жогорку кабаттардан батир алууга кызыкдар эмес. Бийлик кандай гана болбосун, бул маселени чечүүнү көздөйт”.

Коженттеги Сырдарыядан алыс эмес аймакта «Чайнатаун» - «Кытай кварталы» курулуш долбоорун 2015-жылы Чжао Шин Жу башында турган кытайлык архитекторлор тобу иштеп чыккан. Долбоорго ылайык, мында 1200 үй-бүлө жашай турган 15 көп кабаттуу үй курулмак. Мында 4 кабат мектепти жана башка социалдык объектилерди куруу да каралган.

Бирок Коженттин мэри жер астындагы суулардын айынан жана башка дагы көйгөйлөрдөн улам “Кытай кварталы” долбоору ишке ашпай жатканын билдирген.

Бул долбоордун кийинки тагдыры жана үзгүлтүккө учурап жаткан курулуштун себептери тууралуу аталган кытайлык курулуш компаниясы да үн ката элек.

Пикирлерди көрүңүз

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG