Нарындагы Солтон-Сары кенинде жергиликтүү тургундар менен кытайлык инвесторлор ортосунда чыр чыкты. Андан 40ка жакын адам ооруканага кайрылды. Жергиликтүү тургундар кенди чет өлкөлүк компаниянын иштетишине каршы болуп, буга чейинки лицензияны жокко чыгарууну талап кылууда. Учурда өкмөт өкүлдөрү жаңжалды жөнгө салууга аракет кылууда. Кыргызстанда улам-улам катталган кендердеги чыр-чатакка эмне себеп болууда жана аны кантип чечүү керек? Бул суроого “Азаттыктын” “Эксперттер талдайт” берүүсүндө жооп издейбиз. Талкууга Өнөр жай, энергетика жана жер ресурстары боюнча мамлекеттик комитеттин төрага орун басары Карыбек Ибраев, Кыргызстан тоо кенчилер бирикмесинин төрага орун басары Дүйшөнбек Камчыбеков, Жогорку Кеңештин мурдагы депутаты Нарынбек Молдобаев жана парламенттеги “Ата Мекен” фракциясынын лидери Алмамбет Шыкмаматов катышты.