Линктер

ЧУКУЛ КАБАР!
17-Май, 2021 дүйшөмбү, Бишкек убактысы 18:40

АКШ билим берүүгө инвестиция салат


Америка университети

АКШнын мамлекеттик катчысы Жон Керри Борбор Азиядагы Америка университетинин жаңы имаратынын ачылышында АКШнын Кыргызстандагы билим берүү программалары кеңейтилерин билдирди.

Самарканда жекшембиде өткөн “С5+1” форматындагы жолугушууда АКШнын мамкатчысы Жон Керри жана Борбор Азия өлкөлөрүнүн тышкы иштер министрлери мындан аркы кызматташууну тереңдетүү боюнча биргелешкен декларацияга кол коюшту.

Келишимде коопсуздук, соода-экономика, энергетика, экология, дүйнөлүк климат жана билим берүү тармагындагы алакаларды кеңейтүү жолдору камтылган.

Заманбап Америка университети

Жон Керри 31-октябрда Бишкекте өткөн Борбор Азиядагы Америка университетинин жаңы имаратынын ачылышына катышып, сөз сүйлөгөн. Керри АКШ өкмөтү Кыргызстандагы билим берүү тармагына кошуп жаткан инвестицияларын уланта берерине басым жасады. Айтымында, Кошмо Штаттар Америка университетине эле 30 млн. долларга жакын каражат жумшайт.

- Билим берүүнүн канчалык маанилүү экенин жакшы билесиңер. Ушул себептүү АКШ өкмөтү Борбор Азиядагы Америка университетин көп жылдан бери колдоп келет. Биздин бийлик бул окуу жайга инвестициялык фонддун 6 млн. долларын кошкондо 30 млн. долларга жакын инвестиция салды. Мен силерди мындай каржылык колдоолор дагы да уланат деп ишендире кетейин.

Жон Керри университеттин студенттери менен жолугушууда, 31-октябрь, 2015-жыл
Жон Керри университеттин студенттери менен жолугушууда, 31-октябрь, 2015-жыл

Мындан 22 жыл мурда түптөлгөн Америка университетинин жаңы кампусу Бишкектин түштүк тарабына курулду. Окуу жай табигый курулуш каражаттарынын негизинде тикеленип, заманбап технологиялар менен жабдылган. Негизги өзгөчөлүгү катары имаратты жылытуу жана жарыктандыруу үчүн энергияны Күндөн алышын жана жамгыр суусун тазалап туруп пайдалануусун айтсак болот.

Кампустун ачылыш салтанатында билим берүү министри Элвира Сариева Америка университети бир гана Кыргызстанда эмес, Борбор Азиядагы алдыңкы окуу жай экенин белгилейт. Анын баамында, окуу жай бүтүрүүчүлөрү сын жана жаңычыл көз караштагы коомдун кыймылдаткыч күчү болуп саналат.

- Бул университет интеллектуалдарды даярдаган жай. Бир гана билим берүүнү өнүктүрбөстөн, жандуу академиялык чөйрөнү да түзүп жатат. Окуу жай көптөгөн илимий изилдөөлөрдүн борбору катары Борбор Азиядагы алдыңкы билим уясы болоруна терең ишенебиз.

Жаңы имарат
Жаңы имарат

Буга дейре АКШ Кыргызстандагы демократияны жана жарандык коомду өнүктүрүүгө гана каражат бөлүп, экономикалык-социалдык көйгөйлөргө көңүл бурбайт деген сындар айтылып келген.

Адам ресурстарына жасалган инвестиция баарынан маанилүү экенин баса белгилеген саясат таануучу Эмил Жураев билим берүүгө бөлүнгөн каражат билимдүү адамдардын жардамы менен экономикага түздөн-түз салым болорун айтууда.

- Америка тараптан Кыргызстанга экономикалык жактан чоң пайда алып келе турган инвестициялардын болбой келгенин айтып жүрөбүз. Бирок Америка университетине 30 млн. долларлык инвестициянын салынышы чон салым. Ушул окуу жайдан жаңыча ойлонгон жаштар тарбияланып, кыргыз элитасын түзсө Кыргызстандын экономикасына чоң салым болот.

“Манас” аба майданындагы авиабазанын чыгарылышы жана Кыргызстандын АКШ өкмөтү менен болгон келишимди бир тараптуу үзүшү эки өлкө ортосундагы мамилени кыйла сууткан. Байкоочулардын баамында Жон Керринин Борбор Азия сапарын Бишкектен башташы, жаңы имараттардын ачылышы символикалуу түрдө АКШ Кыргызстан менен жаңы деңгээлде кызматташууга кызыкдар экенин билдирет.

Сүрөт баян: Америка университетинин жаңы конушу

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG