Акыркы апталарда Кыргызстанда коррупцияга каршы күрөш боюнча талкуулар менен коштолду. Миллиондогон долларга жеткен паранын жаңы “рекорду” ачыкка чыгып, мүлкүн жашырган мурдагы жетекчиге кылмыш иши козголду. Мунун баарын бийлик коррупцияга каршы күрөш күчүндө деп бааласа, экс-президент Алмазбек Атамбаев “элди алдоо” деп сыпаттады. Миллиондогон сомдорду сол чөнтөккө сологон коррупцияга каршы күрөштүн күңгөй-тескейин “Азаттыктын” “Эксперттер талдайт” берүүсүндө талкууланды. Талкууга Жогорку Кеңештин мурдагы депутаты, саясатчы Равшан Жээнбеков, Конституциялык палатанын мурдагы судьясы Клара Соорокулова, Улуттук коопсуздук комитетинин расмий өкүлү Рахат Сулайманов жана УКМКнын Тергөө башкармалыгынын башчысынын орун басары Максат Эсенбаев катышты.