Кыргызстанда президент Сооронбай Жээнбеков февралда жарыялаган коррупцияга каршы күрөштүн жүрүшү боюнча маалымат берилди. Анда бийлик өкүлдөрү күрөш алкагында Бишкек Жылуулук электр борбору, тарых музейи сыяктуу чуулгандуу иштер ачылып, бейтарап жүрүп жатканын билдирүүдө. Акыркы күндөрү мурдагы премьер-министр Сапар Исаковго айып тагылып, Бишкектин мэри Албек Ибраимовдун аты аталган эки кылмыш иш ачылды. Муну мурдагы президент Атамбаевдин командасына карата саясий куугунтук катары баалагандар бар. Жээнбековдун коррупцияга каршы күрөшү бейтарап жүрүп жатабы? Бул суроого бүгүнкү талкуубузда жооп издейбиз. Талкууга Жогорку Кеңештеги Социал-демократтар фракциясынын депутаты Рыскелди Момбеков, “Жаңы доор” партиясынын лидери, саясатчы Улукбек Кочкоров жана политолог, социалог Самар Сыргабаев катышты.