Линктер

шейшемби, 25-сентябрь, 2018 Бишкек убактысы 07:03

Улан – чындыктын, абийирдин символу


Уланбек Эгизбаев.

Ие, кайран баатыр, баарыбыз сага карап түзөнөр болдук мындан кийин! Тилин тишине катып жүргөндөр көп бүгүн. Сенин өлүмүң ошолордун абийирин козгоор өлүм болду.

Сени өлдү деген суук кабар элди аралап, жүрөгүн ойготту. Баатырдын өлүмү гана элди ушинтип термелтмек. Манастын чыныгы урпагы белемсиң, Улан! Сенин өлүмүң канчалардын уятын козгоп туру бүгүн!

Заман өз баатырын ушинтип жаратып келген, жарата берет. Жараткандын кудурети элибизди эсиңе кел деп, сенин өлүмүң аркылуу эскертүү бергениби бул?! Мамлекеттик машинеге сенчелик каршы чыгып, сенчелик тобокелчиликке баш байлаган эр-азаматтар табылгыс бүгүн. Элиңди мүнкүрөтүп, эчкиртип ыйлатып кеткениң ошол.

"Азаттыктын" канаты кайрылды...
please wait

No media source currently available

0:00 0:09:52 0:00

Чагылгандай өмүрүң жалп өчөрдөн бир аз күн мурун эле коррупция боюнча көрсөтүүлөрүңдү колуктум экөөбүз тиктеп отуруп, жеңеңдин оозуна сала бергендей болуп жакасын уучтаган: "Ушул жигитти өлтүрүп кетишпесе экен" деп. Көрсө сенин өмүрүңдөн менин келинчегим эле эмес, далай кесиптешиң кооптонуп келген экен. Ал эмес, «Азаттыктын» жетекчилиги да сенин журналисттик ишмердигиңден чочулап жүрүшкөнүн коомчулукка өздөрү айтты. Керек болсо эң айбаттуу маалымат булагы саналган «Азаттыктагы» кесиптештериң деле «арыдан бериге» көнбөгөн журналисттик ишмердигиңден чочулашчу турбайбы… Демек, сен чыныгы кесипкөйлүктүн да чегинен ашып, журналисттик рамкага сыйбай калган баатыр экениң! Сендей баатырдын жүрөгү батыл болгон үчүн башкаларыбыз сенин өмүрүңдөн кооптончу турбайбызбы көрсө…

Ооба, коррупционерлерге азыр кимибиз гана тиш кайрап отурганыбыз жок. Элдешкис кас душманыбызды жек көргөндөй коррупционерлерге болгон жек көрүү сезимибизди сенчелик ачыкка чыгара албай отурабыз бүгүн. Агер тилиңди тишиңе катсаң, сен деле бүгүн баарыбыздын катарыбызда аман жүрмөктүрсүң, бүгүн… Бирок сен тобокелдүү өмүр жолун тандапсың, жубарымбек! Тилин тишине катпаган сендей баатырлар саналуу бүгүн. Сендей баатырлар, сендей жубарымбектер, сендей жашабагырлар жалгыз-жалкыдан туулат экен өмүрдө! Алгыр куштун тукуму аз туулат экен, жарыкка…

Кайран шумкар, кайран баатыр! Жашабагыр Улан иним, кош бол! Жаның көккө учуп кеткени менен сен да Манас баатырдай өлбөс, өчпөс ысымга айланасың! Кара жерге сенин денең көмүлгөнү менен жүрөгүң элге өтүп кетти. Сенин жүрөгүң – абийирдин, чындыктын символу болуп калды кыргызда! Элдин намыс-ары болсо, мындан кийин сенин арбагың үчүн коррупция менен жапатырмак күрөшөр болсо кана! "Эл баатыры" болуп жүргөн аксакалдар да сендей жашабагырдын өмүрүнөн өрнөк алаар болсо кана! Болгону 28 жашыңда жайраганың менен, бирок сен 82 жаш өмүр сүргөн карыядан да таасирдүү өрнөк калтырып кеттиң элиңе!

Башкалар жөн эле жүрүп өлсө, сен жөн өлгөнүң жок! Сен адамдык бийик сапатың менен чыныгы макенчил, чыныгы атуулдук озуйпаңды орундата алдың. Көрсө, пенде баласы кыска өмүр сүрөбү, узак өмүр сүрөбү, кеп анда эмес тура. Сен ошо кыска өмүрүңдө да кыргыздын кыйырына тараган эмгегиң менен элдин уулу болуп калганыңды; сага топурап келип топурак салып өксүгөн топтун аягы үзүлбөгөнү көрсөттү го...

Сенин күрөшчүл өмүрүң улууга да, кичүүгө да сабак. Себеби, жүрөгү сенек болуп катып калган көптөрдүн жүрөгүн ойготуш үчүн өлгөндөйсүң…

Канчалаган жемкорлор көрдүйнөгө көмүлүп өлүп кетти?! Канчалары намыс-арга чөмүп өлүп кетти?! А сен касиеттүү көлгө чөгүп өлдүң. Тунук сууга, касиеттүү Ысык-Көлгө! Суудан таза, суудан ыйык не бар-ов. Сен кара жердин алдына кыпындай да ыпыластыкты алып кеткениң жок. Тунук суудай таза кеттиң. Артыңда суудай өлбөс ысымың калды, а сен баатыр, чым жаздандың. Манас атабыз элин жоодон коргоп өлсө, а сен коррупциядан коргойм деп жүрүп өлдүң! Адамдык улуу сапаттын өрнөгүн калтырып кеттиң бизге.

Эми мекенчилдик сезимибизге тамызгың калгай экен, баатыр...

Олжобай Шакир

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.

Сиздин пикир

пикирлерди көрсөт

XS
SM
MD
LG