Линктер

ЧУКУЛ КАБАР!
7-Февраль, 2023-жыл, шейшемби, Бишкек убактысы 07:40

Өзбекстан: энергетикалык кризистин эпкини


Иллюстрациялык сүрөт.

Расмий Ташкент жекшембиден бери өлкөнүн Бухара, Фергана, Анжиян, Сурхандарыя облустарында жаратылыш газын берүү үзгүлтүккө учураганын ырастады. Калың жааган кардан улам Ташкенттен башка шаарларга автoбус каттамы толугу менен токтогону кабарланды.

Быйыл кыш өзбекстандыктар үчүн оор болчудай. Баш калаа Ташкентке жааган калың кар, ызгаардуу суук энергетикалык көйгөйлөргө себеп болду.

Ташкенттик Шахноза Усманова үч күндөн бери көп кабаттуу үйлөргө жылуулук келбей жатканын Фейсбук баракчасына жазды.

"Нукус көчөсүндөгү көп кабаттуу беш үй, үч күндөн бери жылуулуксуз турат. Батирлер суук. Батареялар тоңуп калды. "Таштеплоэнерго" басым жок экинин айтып жатат. Мекемелер менен байланышууга мүмкүнчүлүк жок. Маселени чечүү үчүн кайда кайрылуу керек? Кыш эми гана башталды".

Дүйшөмбүдөн тарта Ташкент автобекетинен башка шаарларга автобус каттамдары убактылуу токтотулганы кабарланды. Өзбекстандын Транспорт министрлигинин маалымат кызматы кабарлагандай, бул чектөө жолдор тоңуп, үшүк жүргөндүктөн жүргүнчүлөрдүн коопсуздугун камсыздоо максатында киргизилген.

Ташкент: газ толтурган станциялар убактылуу жабылды

Ал арада жекшембиде шаардык мэрия Ташкентте автоунааларга газ толтурган станциялар убактылуу жабылганын кабарлады.

Маалыматка караганда, коммуналдык кызматтар колдогу газды бардык керектөөчүлөр арасында теңме-тең таратууга аракет жасаганы менен газ басымынын төмөндөшү, ресурстардын жетишсиздиги буга түрткү болду.

Буга чейин соцтармактарда газ станциялары бир нече күнгө чейин жабылары кабарланган. 4-декабрда "Худудгазтаминот" ишканасы бул маалыматты четке кагып, калкты мындай кеп-сөздөргө ишенбөөгө чакырган.

Ошол эле күнү Энергетика министрлиги сууктан улам Фергана өрөөнүндө электр кубатын берүүдө үзгүлтүк болуп жатканын да билдирген.

"Өкмөт кышка даяр эмес"

"Давлетовуз" Телеграм-каналында Өзбекстандагы мындай энергетикалык кризиске кирептер кылгандарды жоопко тартуу маселеси талкууланды.

"Өкмөт кышка даяр эмес, бүгүнкү энергетикалык кризисти чече албайт. Жакынкы жана узак мөөнөткө кандай пландар бар? Жаңы министр келгенден бери элге комментарий бере элек. Бүгүнкү энергетикалык кризистин себепкерлери белгилүү. Мындан беш-алты жыл мурда сөз берип, кызматтагы чечимдери менен бизди ушул күнгө жеткирген адамдар кайда? Балким, алардын жоопкерчилиги тууралуу маселени карап чыгарбыз? Эл "баатырларын" билсин" деп жазат "Давлетовуз" Телеграм-каналы.

Өзбекстандык экономист Отабек Бакиров көгүлтүр отко салык үч эсеге кыскарганы менен, өлкөдө жаратылыш газын өндүрүү азайып баратканын эскертет.

"2022-жылдын 1-январынан тарта "Өзбекнефтегаздан" башка бардык газ өндүрүүчү ишканалардын салыктары 30 пайыздан 10% чейин төмөндөтүлгөн. Мындан тышкары, аларга башка салыктардан бошотуу боюнча жеңилдиктер да берилди. Бирок биз бул жеңилдиктер такыр эле пайдасыз экенин, энергетика тармагында жеңилдиктердин ийкемдүүлүгү жок экенин айтканбыз".

Экибастуз: түтүктөрдү калыбына келтирүү иши аяктап калды

Ал эми 28-ноябрда Казакстандын Павлодар облусунун Экибастуз шаарында жергиликтүү жылуулук электр борборунун отказаны токтоп калып (ЖЭБ), өзгөчө кырдаал режими жарыяланган. Алгач шаардагы көп кабаттуу 17 үй, беш социалдык объект жана 21 юридикалык объект жылуулуксуз калган.

Экибастуз шаары. 2022-жылдын 28-ноябры.
Экибастуз шаары. 2022-жылдын 28-ноябры.

“Азаттыктын” казак кызматынын маалыматы боюнча, Экибастузда жекшемби күнгө карата көп кабаттуу 11 үй жылуулук борборуна кошула элек. Шаарда баш-аягы 689 көп кабаттуу үй бар. Оңдоо-калыбына келтирүү иштерине 500гө жакын адам тартылган.

Экибастузда 150 миңдей калк жашайт. Шаарда көмүр өндүрүшү жана электр энергетикасы өнүккөн.

Өзбекстандын Энергетика министрлигинин Улуттук диспетчердик борборунун директору Музаффар Бобоев 12-ноябрда энергоблоктордун технологиялык өлчөмдөрдүн төмөндөп кетпеши жана жабдуулардын бузулуп калбашы үчүн айрым жабдыктардын иши токтотулганын эскерткен. Натыйжада Ташкент Жылуулук станциясында иштелип чыккан электр энергиясынын көлөмү азайган.

Мындан улам Улуттук диспетчердик борбор жадыбал менен улам бир жерде электр жарыгын өчүрүп келет.

Бобоевдин катында айтылгандай, электр энергияны керектөө азайтылбаса, Өзбекстандын айынан Борбор Азиядагы Бирдиктүү энергетикалык системада авария кайталанышы ыктымал.

Белгилей кетсек, быйыл 25-январда Өзбекстан, Кыргызстан жана Казакстандын көптөгөн жерлеринде электр энергия берүү үзгүлтүккө учурап, ири аймак жарыксыз калган. Мартта өкмөттөр аралык комиссия буга Өзбекстандын энергосистемасындагы алешемдик алып келген деген жыйынтык чыгарган.

Казакстан менен Кыргызстанда электр энергия менен камсыздоо бир нече саатта калыбына келтирилсе, Өзбекстанда буга бир нече күн кеткен.

  • 16x9 Image

    Элвира Будайчиева

    "Азаттык" радиосунун Стамбулдагы кабарчысы. Кыргыз-түрк "Манас" университетин жана Стамбулдагы Йедитепе университетинин магистратурасын бүтүргөн.

Facebook шеринеси

XS
SM
MD
LG