Линктер

жума, 21-сентябрь, 2018 Бишкек убактысы 09:57

Майк Помпео дароо чет өлкөгө чыкты


Майк Помпео НАТОнун жыйынында. 27-апрель, 2018-жыл.

Майк Помпео 27-апрелде эртең менен Брюсселде болуп калды. НАТОнун баш катчысы менен учурашып жатып ал кызматтык антын берери менен Брюсселге келгенин баса белгиледи:

- Буга олуттуу себеп бар. Бул жерде бүгүн жасала турган иш баа жеткис. Маанилүү максаттар бар. Ошон үчүн бул миссия Америка Кошмо Штаттары үчүн зор мааниге ээ. Президентибиз бул жакка келишимди абдан каалады. Келе алганыма мен да кубанычтамын. Жемиштүү жолугушууну чыдамсыздык менен күтүп жатам.

НАТО жыйынындагы министрлер. 27-апрель, 2018-жыл.
НАТО жыйынындагы министрлер. 27-апрель, 2018-жыл.

Аскердик альянс НАТОго кирген өлкөлөрдүн лидерлеринин жылдык саммити июлда өтөт. Тышкы иштерди тейлеген министр, жетекчилер ошону утурлай чогулууда. Буга чейин АКШ Мамдепартаментинин расмий өкүлү негизинен Орусиянын Украина, Грузия жана Сирия боюнча саясатына көңүл бурулааарын айткан эле. Батыш Кремль бул аймактарга чоңдугун салып, басым жасап жатат деп эсептейт.

Ошондой эле жыйында Европанын түштүк ыптадагы чек араларында коопсуздукту күчөтүүгө маани берилмей болууда. Күн мурунтан пландалган бул темаларды сүйлөшүү менен катар эле башка министрлер үчүн Помпео менен таанышып, баш терисин байкап көрүү да кызык.

- Ал киши менен жолугууну чыдамсыздык менен күтүп атам. Ант бергенден бир түндөн кийин эле биякка келиши жакшы таасир калтырат. Менимче бул таасирдүү башталыш, - деди Голландиянын башкы дипломаты Стеф Блок.

НАТОдогу жыйындан чыгып, жаңы мамкатчы АКШнын Жакынкы Чыгыштагы өнөктөштөрү Сауд Арабиясына, Иорданияга жана Израилге жол тартат. Помпео кыска мөөнөттө кеңири масштабдагы, маселен Сирия менен Ооганстандагы узакка созулган согуштар, Йемен менен Сириядагы Ирандын ролу тууралуу, андан тышкары Орусияга байланыштуу эл аралык маселелерди талкуулаганы турат.

Тиллерсон Трамп менен тил табыша албаганы үчүн кызматтан алынган.
Тиллерсон Трамп менен тил табыша албаганы үчүн кызматтан алынган.

Помпео мурдагы баш катчы Рекс Тиллерсондон кыйла жаш, 55те. Президент Дональд Трамп да аны "кубаты, таланты, акыл көрөңгөсү мол" деп мактап жүрөт. "Баштатан жакшы пикирлешим, ишенимдүү адамым" деп да тааныштырган. Анын үстүнө Тиллерсонго караганда Помпеонун саясий жолу узагыраак. 2011-жылдан бери конгрессмен, 2017-жылдан бери чалгын кызматынын жетекчиси болуп иштеди. Деген менен Помпео деле Тиллерсон сыяктуу дипломатияга жаңыдан келип жатат.

Сын айткан сенаторлор ал Трамптын эл аралык маселелерди чечүүдөгү катаал жана кескин саясатын колдоп, улантабы деп чочулашууда. Помпео "түйүндүү маселелерди сүйлөшүү менен гана чечебиз" деп аларды жайгарып жаткан кези. Ал "аскердик аракет эң акыркы гана чара болот" деп билдирген.

Майк Помпео менен Ким Чен Ын жолугушкан учур.
Майк Помпео менен Ким Чен Ын жолугушкан учур.

Шайланардан үч жума мурда Помпео тымызын Түндүк Кореяга барып, Ким Чен Ын менен жолугуп келиши да ошол сөзүн ырастап тургандай. Ал жолугушуу июндун башындагы АКШ-Түндүк Корея лидерлеринин сүйлөшүүсүн уюштурууга байланыштуу деп түшүндүрүлгөн.

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.

Сиздин пикир

пикирлерди көрсөт

XS
SM
MD
LG