7-мартка караган түнү Украинанын Харьков аймагына орус аскерлери жасаган ракеталык чабуулунан жети адам каза болуп, кеминде 15и жаракат алды. Жергиликтүү бийликтин маалыматы боюнча, баллистикалык ракета беш кабаттуу турак үйгө тийген.
Каза болгондордун арасында эки бала жана 65 жаштагы жергиликтүү тургун бар. Жабыркаган төрт адам ооруканага жаткырылды, 11 жаштагы баланын абалы оор деп бааланууда.
Куткаруучулар урандыларды тазалоону улантууда. Жергиликтүү бийликтин маалыматына караганда, урандылар астында калган адамдар болушу мүмкүн.
Харьковдун Киев районунда ракеталык аткылоодон жалпысынан 19 көп кабаттуу үй жабыркады. Мындан тышкары, мектеп жана соода жайлары зыян тартты.
Ишембиге караган түнү орус аскерлери Киевге ракеталык сокку урушту. Шаардын мэри Виталий Кличконун айтымында, үч райондо ракеталардын сыныктары түшкөн. Жабыркагандар жок.
Одесса облусунда орус дрондору инфратүзүмдүк объектилерге чабуул жасап, ал жерлерде өрт чыкканын Украинанын Өзгөчө кырдаалдар боюнча мамлекеттик кызматы билдирди. Запорожьеде орус күчтөрүнүн аткылоосунан улам көп кабаттуу үйдүн 30 батиринин терезелери талкаланып, үч айлык ымыркай кыз жараат алды.
Украинанын темир жол компаниясы жапырт чабуулдардан улам Ровно, Винница жана Житомир облустарында бир катар поезддер багытын өзгөртүүгө мажбур болгонун жарыялады.
Украина Куралдуу Күчтөрүнүн Аскердик-аба күчтөрү билдиргендей, бир түн ичинде орус аскерлери Украинага 509 ракета жана дрон учуруп, анын 472си атып түшүрүлдү. 22 жерде тогуз ракета жана 26 дрондун тийгени катталды.
7-мартта эртең менен Орусия Украинанын Донецк облусунун түндүгүндөгү Краматорск шаарынын борборуна КАБ-500 авиабомбасын таштады. Облустук администрациянын башчысы Вадим Филашкиндин айтымында, кеминде алты адам жараат алды, алардын үчөө балдар.
"Донбасс.Реалии" кабарчысы Сергей Горбатенко билдиргендей, 12 көп кабаттуу үй, беш административдик имарат жана 22 унаа зыянга учурады.
Расмий Киев Венгрия бийлигин Будапештте Украинанын жети жаранын барымтага алды деп айыптады. Бул тууралуу Украинанын тышкы иштер министри Андрей Сибига билдирди.
«Бүгүн Будапештте венгриялык бийлик Украинанын жети жаранын барымтага алды. Мунун себептери, алардын саламаттыгы жана алар менен байланышуу мүмкүнчүлүгү азырынча белгисиз», — деп жазды министр X социалдык тармагындагы билдирүүсүндө.
Сибиганын айтымында, кеп Украинанын ири банкы деп эсептелген «Ощадбанктын» кызматкерлери тууралуу болуп жатат. Алар Австриядан Украинага акча жана баалуу буюмдарды инкассациялык унаалар менен мамлекеттик банктардын ортосундагы кадимки жараяндын алкагында алып бара жатышкан.
Министрдин айтымында, Киев украин жарандарынын дароо бошотулушун талап кылган дипломатиялык нота жөнөттү.
«Ощадбанк» тараткан билдирүүгө ылайык, GPS автоунаалар Будапешттин борборундагы күч түзүмдөрүнүн бирине жакын жерде токтотулганын көрсөтүүдө. Ал эми банктын кызматкерлеринин так кайда экени азырынча белгисиз.
Маалыматта жүк эл аралык эрежелерге жана Европанын бажы процедураларына ылайык расмий катталгандыгы белгиленген. Машинелерде 40 миллион доллар, 35 миллион евро жана 9 килограмм алтын болгон. «Ощадбанк» өз кызматкерлерин жана мүлкүн дароо бошотууну, ошондой эле аларды Украинага кайтарууну талап кылды.
Буга чейин Венгрия Украинага Евробиримдик бөлө турган 90 миллиард евро өлчөмүндөгү насыя берүүнү бөгөттөп, Киевден «Дружба» мунай түтүгү аркылуу Борбордук Европага орус мунайын транзит кылууну кайра жандандырууну талап кылган.
Украинанын президенти Владимир Зеленский 5-мартта Венгриянын премьер-министри Виктор Орбан Украинага кредит берүү маселесин мындан ары да бөгөттөсө анын дарегин Украинанын куралдуу күчтөрүнүн жоокерлерине берерин айткан.
Орусия менен Украина "300гө 300" форматында туткун айырбаштоо жүргүзүштү. Бул тууралуу 6-мартта Орусиянын Коргоо министрлиги билдирди.
ТАСС жана "Коммерсант" басылмалары да эки өлкө ортосунда кезектеги туткун айырбаштоо жараяны өткөнүн Коргоо министрлигине шилтеме кылып жазышты.
Маалыматта белгиленгендей, "Бириккен Араб Эмирликтери жана АКШ алмашуу учурунда гуманитардык ортомчулук аракеттерин көрсөтүшкөн" деп айтылган.
Украина тарап алмашууну азырынча тастыктай элек.
Мурунку күнү Орусия менен Украина "200гө 200" алмашуусун жүргүзүшкөн.
Орусия АКШ жана Украинанын өкүлдөрү катышкан тынчтык сүйлөшүүлөрдөн чыгуу мүмкүнчүлүктөрүн караштырып жатат. Бул тууралуу Bloomberg басылмасы бул сүйлөшүүлөрдүн жүрүшүнөн кабары бар, аты-жөнү айтылышын каалабаган булактарына таянып жазды.
Ага ылайык, Орусиянын расмий өкүлдөрү Киев Донецк облусунан аскерлерин алып кетүүдөн баш тарткан шартта АКШнын ортомчулугу менен өтүп жаткан сүйлөшүүлөрдү андан ары улантуунун кажети жок деп эсептеп жатат. Бул расмий Москванын негизги талабы экени айтылып келет.
Bloomberg басылмасынын булактары берген маалыматка ылайык, Орусия Сумы, Харьков жана Днепропетровск облустарынын оккупацияланган аймактарынан аскерлерин чыгарып кетүүгө даяр. Ошондой эле Херсон жана Запорожье облустарындагы өзү көзөмөлдөгөн аймактарды дагы чоңойтууга аракет кылбайт. Учурда Орусия башкарып жаткан Запорожье атомдук электр станциясынын келечеги тууралуу маселеде орток пикир табыла элек.
Аталган агенттикке маалымат берген булактарга ылайык, сүйлөшүүлөрдүн келерки айлампасы болжол менен 4-5-март күндөрү өтөт жана мындай жолугушуулар андан ары уланабы же жокпу, ошондо белгилүү болот.
Москва бул маалыматтарга азырынча комментарий бере элек.
Буга чейин Украинанын президенти Владимир Зеленский үч тараптуу кезектеги сүйлөшүүлөр март айынын башында Бириккен Араб Эмирликтеринин (БАЭ) борбору Абу-Дабиде өтүшү мүмкүн экенин билдирген. Ал бул тууралуу 26-февралда Женевада украин жана америкалык делегациялардын ортосундагы консультациялар боюнча комментарий берип жатып маалымдаган.
Анын алдында АКШ президенти Дональд Трамп Зеленский менен сүйлөшүүсүндө Украинадагы согушту мүмкүн болушунча тезирээк токтоткусу келерин билдиргени кабарланган.
Жыл башталгандан бери үч өлкөнүн өкүлдөрү үч жолу, эки ирет Абу-Дабиде жана үчүнчү жолу Женевада жолукту.
АКШнын ортомчулугу менен өтүп жаткан тынчтык сүйлөшүүлөрүндөгү негизги темалардын бири аймактык маселе бойдон калууда. Орусиянын президенти Владимир Путин буга чейин Донбасс Орусиянын “тарыхый аймагы” экенин айтып, аны аскердик же башка жолдор менен кайтарып ала турганын билдирген. Киев болсо украин аскерлеринин Донбасстан чыгып кетишин кабыл алынгыс деп эсептейт.
Украин бийлиги ошондой эле коопсуздук кепилдиктерин, анын ичинде союздаш өлкөлөрдүн аскерлерин Украинага жайгаштыруу мүмкүнчүлүгүн талап кылууда.