АКШнын улуттук коопсуздук саясатындагы таасирдүү адамдардын бири, Иранга карата катаал позицияны көптөн бери жактап келе жаткан республикачыл сенатор Линдси Грэм Иранга каршы соңку операцияны колдогон билдирүү таратты.
Ирандагы "канкор аятолланын режими жакында жок болот деген ойдо экенин" айткан Грэм:
"Бул операция жакшы пландаштырылган. Ал катуу, кеңири масштабдуу жана акыры ийгиликтүү болот деп ишенем".
Ирандын мамлекеттик IRNA маалымат агенттиги Иорданиядагы Мукаф ас-Салти аба базасында жарылуу болгонун билдирди.
Агенттик бул базаны "Америкалык логистиканын борбору" жана аймактагы "АКШнын аймактагы эң маанилүү аскердик жайларынын бири" деп атады.
Анын алдында Иран Перс булуңундагы америкалык базаларга сокку урганын Fars маалымат агенттиги Ислам революциясынын сакчылар корпусуна таянып билдирген.
"Ирандын ракеталык соккулары Катардагы ал-Удейд аба базасына, Кувейттеги Али ал-Салем аба базасына, Бириккен Араб Эмирликтериндеги ал-Дафра аба базасына жана Бахрейндеги АКШнын деңиз флотунун Бешинчи флотунун базасына багытталды", - деп айтылды билдирүүдө.
Reuters агенттиги Катардын борбору Дохада жана ал-Удейд аскердик базасынын жанында көптөгөң жарылуу болгонун кабарлады. Өлкөнүн Коргоо министрлиги Ирандын ракеталары атып түшүрүлгөнүн билдирди.
Сауд Арабиясынын борбору Эр-Риядда жана Бириккен Араб Эмирликтеринин борбор шаары Абу-Дабиде да жарылуулар катталды.
Өз кезегинде Ирандын Коргоо министрлиги "АКШнын аймактагы бардык аскердик базалары" Ирандын жооп иретинде жасалуучу соккусунун бутасы болорун расмий түрдө билдирди.
Европа Биримдигинин тышкы саясат боюнча башкы комиссары Кая Каллас АКШ менен Израилдин Иранга каршы аба соккуларын баштоосу жана Тегерандын Жакынкы Чыгыштагы аймактарды бутага алып, жооп кайтаруусу "кооптуу" экенин айтты.
Х социалдык түйүнүндөгү баракчасына жарыялаган билдирүүсүндө ал Еврошаркет "дипломатиялык жолдорду караштыруу максатында араб өнөктөштөрү менен тыгыз байланышта иштеп жатканын" белгиледи.
"Жайкын тургундарды коргоо жана эл аралык гуманитардык укук артыкчылыктуу багыт болуп саналат. Биздин консулдук түйүн Европа Биримдигинин жарандарынын чыгып кетишин жеңилдетүү менен толук алектенет. Европа Биримдигинин бул аймактагы анча көп эмес сандагы кызматкерлери чыгарылып жатат", - деп билдирди Каллас.
Кыргызстан соңку окуялардан улам өз жарандарын Иранга барбай турууга чакырды.
Мекеменин 28-февралда жарыялаган билдирүүсүндө "Жакынкы Чыгыштагы кырдаалдын курчушуна жана Ирандын аймагына жасалып жаткан аба соккуларына байланыштуу Кыргыз Республикасынын жарандарын кырдаал туруктуу болгонго чейин Иранга баруудан карманууга катуу сунуштайт" деп айтылды.
Ирандын аймагында жүргөн кыргызстандык жарандарга өзгөчө кырдаалдар жаралган учурда дароо Кыргызстандын Тегерандагы элчилигине же ТИМдин Консулдук департаментине төмөндө көрсөтүлгөн байланыштар аркылуу кайрылуу сунушталат:
Кыргыз Республикасынын Иран Ислам Республикасындагы Элчилиги (Тегеран шаары):
+98 21 2283 0354, +98 935 250 5229
E-mail: kgembassy.ir@mfa.gov.kg
Кыргыз Республикасынын ТИМинин Консулдук департаменти (күнү-түнү):
+996 999 312 002
E-mail: dks@mfa.gov.kg
28-февралга карата ачык булактардан алынган маалыматтарга ылайык, Түркия менен Иран ортосундагы мамлекеттик чек ара расмий түрдө жабылган жок. Чек арадагы көзөмөл-өткөрүү пункттары кадимки тартипте иштеп жатат.
Кошумча шашылыш байланыш телефондору:
Кыргыз Республикасынын Армения Республикасындагы Ардактуу консулу:
+374 91 919191
Кыргыз Республикасынын Түркия Республикасындагы Элчилиги:
+90 312 491 35 06, +90 545 689 68 00
Кыргыз Республикасынын Түркмөнстандагы Элчилиги:
+993 12 48 22 95, +993 12 48 22 96, +993 65 69 40 59
Кыргыз Республикасынын Афганистандагы Элчилиги:
+93 77 9099326, +93 77 654 4504 (WhatsApp)
Кыргыз Республикасынын Азербайжан Республикасындагы Элчилиги:
+994 993 312 312, +994 12 505 56 74, +994 55 750 53 01
"Кыргыз Республикасынын Тышкы иштер министрлиги кырдаалдын өнүгүшүн тыкыр көзөмөлдөөнү улантат, ошондой эле жарандарды сабырдуулукту сактоого жана жеке коопсуздук чараларын так аткарууга чакырат", - деп айтылды өлкөнүн тышкы саясий мекемесинин билдирүүсүндө.
Шерине