Израилдин коргонуу армиясы Ирандын борборун кайрадан бутага алып, соккулардын жаңы толкунун баштаганын 7-мартта жарыялады.
"Израилдин коргонуу күчтөрү (ЦАХАЛ) Тегерандагы Ирандын террористтик режиминин инфраструктурасына каршы ири масштабдуу сокку уруу толкунун баштады", - деп айтылды билдирүүдө.
Би-Би-Си өзүнүн перс кызматындагы кабарчыларынын маалыматына таянып Тегеранда кайрадан жарылуулар угулуп жатканын жазды.
Буга чейин Израил аскерлери Ирандан атылган ракеталар аныкталганын билдирген.
"Абадан коргонуу системалары коркунучту токтотуу үчүн иштеп жатат", - деп билдиришти аскерлер.
Ирандын тышкы иштер министринин орун басары Мажид Тахт-Раванчи эгерде Европа Биримдигинин кайсы бир өлкөсү АКШ менен Израилге кошулуп Иранга сокку урса, алар Иран үчүн мыйзамдуу бутага айланарын билдирди.
"Иранга каршы агрессияга кошулган, Америка жана Израил менен биригип, Иранга каршы агрессияга кошулган кайсы гана өлкө болбосун, сөзсүз түрдө Ирандын жооп кайтаруу аракеттеринин мыйзамдуу бутасы болуп калат", - деп Рейтер агенттиги 7-мартта Тахт-Раванчынын айткандарын келтирди.
Рейтер маалымат агенттиги Европанын көпчүлүк өлкөлөрү аймактагы аскердик аракеттерди токтотууну жана сүйлөшүүлөргө кайтуу чакырыктарын айтып жатканын да белгиледи.
Азербайжандын Нахичеван шаарындагы аэропорттун аймагына Иранга тийиштүү дрон кулаганын жергиликтүү медиалар кабарлады. Report жана APA агенттиктери Иран “дрон менен сокку урганын” жазышууда.
Азербайжандын Тышкы иштер министрлигинин маалыматына ылайык, бир дрон аэропорттун терминалынын имаратына урунган, ал эми экинчиси Шекарабад айылындагы мектептин жанына түшкөн. Аэропорттун имаратына зыян келтирилип, эки адам жаракат алган.
Баку бул окуя үчүн жоопкерчиликти Тегеранга жүктөп, жооп чараларын көрүү укугу бар экенин билдирди. Ошондой эле Ирандын Бакудагы элчиси Тышкы иштер министрлигине чакыртылып, ага нааразылык нотасы тапшырылды.
Нахичеван шаарынын тургуну "Азаттык" радиосунун азери кызматына билдиргендей, ата-энелерди балдарын мектептен алып кетүүнү суранышкан.
Полиция жергиликтүү тургундарды үйлөрүнөн чыкпоого жана ар кайсы жерде топтолбоого чакырды.
Телеграм каналдар жарыялаган видеолордо аэропорттун жанында жарылуу болуп, асманга түтүн көтөрүлгөнү көрүнөт.
Ирандын бийлиги азырынча Азербайжандын аймагына кулаган дрондор тууралуу маалымат бере элек.
Буга чейин Qazetchi басылмасы өз булактарына таянып, Азербайжан өз аскерлерин Иран менен чек арада жогорку даярдыкка келтиргенин жазган. Маалыматка караганда, дрондорго жана төмөн учкан учактарга каршы коргонуу системалары да жайгаштырылган. Бул маалымат расмий түрдө ырасталган эмес.
28-февралда Израил жана АКШ Иранга каршы операция баштаган. Буга жооп катары Иран Израилге гана эмес, аймактагы башка өлкөлөргө да сокку урууну улантып жатат.
АКШнын суу астында сүзүүчү кемеси Шри-Ланканын жээгинде Ирандын аскердик кемесин чөктүргөнүн Пентагондун башчысы Пит Хегсет ырастады. Ал кемеге эл аралык сууда торпеда атылганын айтып, операциянын башка чоо-жайына токтолгон жок.
Шри-Ланканын тышкы иштер министри Вижита Херат сөз Ирандын Аскер-деңиз күчтөрүнүн Dena фрегаты тууралуу жүргөнүн билдирди. Ал бортто 180 деңиз аскери болгонун айтты. Куткаруучулар экипаждын 32 мүчөсүн аман алып чыкканга үлгүрүштү.
Ага чейин 100дөн көп моряк дайынсыз болуп жатканы маалымдалган. Кытайдын “Синхуа” агенттиги алар каза тапканын кабарлады. Ал эми Шри-Ланканын бийлиги бери дегенде 80 кишинин өлүмүн бышыктады.
Рейтер агенттиги америкалык булактарга таянуу менен фрегат АКШнын Иранга каршы операциясынын алкагында чабуулга туш болгонун билдирген.
2-мартта Американын президенти Дональд Трамп аскерлер Ирандын тогуз кемесин чөктүргөнүн, “айрымдары маанилүү” экенин айткан. Президент ал өлкөнүн аскер флотунун баш кеңсеси жок кылынгандан кийин аскердик кемелери бутага алынарын кошумчалаган.
Ирандын бийлиги соңку окуяга байланыштуу комментарий бере элек, бирок айрым мамлекеттик медиа АФП агенттигинин кабарын басып чыгарышты.
Шерине