Израилдин аскердик мекемелери Ирандын мунай инфратүзүмдөрүнө биринчи ирет абадан сокку урганын маалымдады. Эл аралык dpa маалымат агенттиги кабарлагандай, ЦАХАЛдын өкүлү 7-мартта Тегеранда мунай сакталган 30дан ашык резервуарга чабуул жасалганын тактаган.
Ислам революциясынын сакчылар корпусу Израилдин аба күчтөрү Тегерандын түштүк бөлүгүндөгу мунай кампасына чабуул жасаганын ырастап, жооп чара катары алар Израилдин мунайды кайра иштетүүчү заводдоруна сокку уруп жатышканын билдирди.
Ирандын Мунай министрлигинин атын атабаган өкүлү ирандык Fars агенттигине Тегерандагы жана анын жанындагы Кереж шаарындагы мунай кампаларына чабуул жасалганын бышыктаган.
ЦАХАЛ 7-марттын кечинде тараткан маалыматта соңку эки күндүн ичинде Ирандын аймагына 300дөн ашык сокку урушканын жана Ливандагы радикалдык “Хезболла” кыймылынын объектилерине 170 сокку урушканын маалымдады.
АКШнын президенти Дональд Трамп 7-мартта Truth Social социалдык түйүнүнө Ислам Республикасына бул күнү “катуу сокку уруларын” жазган эле.
АКШ менен Израилдин Иранга каршы биргелешкен согуштук операциясы 28-февралда башталган. Иран ага жооп катары Израилди эле эмес, чөлкөмдөгү бир катар өлкөлөрдүн аймактарына абадан сокку урган. Аткылоолор эки тараптан тең улам катталууда.
7-мартка караган түнү Ирандын борборундагы эки эл аралык аэропорттун бири болгон Мехрабад аба майданына абадан сокку урулду. Ал жак өрттөнүп, кара түтүн каптап жаткан сүрөттөрдү Би-Би-Си жарыялады.
Ирандын мамлекеттик маалымат каражаттары да сокку болгонун кабарлашты. Социалдык түйүндөрдө аэропортту жалын каптап, түтөп жатканы тартылган видеолор да жарыяланууда, алардын аныктыгын CNN тастыктады.
Бир аз мурун Израилдин аскерлери Тегеранга каршы жаңы ири соккуларды баштаганын жарыялаган.
Ирандын БУУдагы туруктуу өкүлү Амир Саид Иравани АКШ менен Израилдин бир жума мурун башталган операциясынын соккуларынан Иранда кеминде 1332 жайкын тургун каза болгонун билдирди.
Иравани Ирандын Кызыл Ай коомунун маалыматына таянып билдиргендей, каза болгондордун арасында аялдар жана балдар бар.
"Дагы миңдеген адамдар жаракат алышты жана жабыркагандардын саны өсүүдө", - деген дипломат мектептер, ооруканалар жана башка жарандык инфраструктура атайылап бутага алынганын кошумчалады.
АКШ менен Израил жай тургундарга же жарандык инфраструктурага сокку урулганын четке кагып келет.
Ирандын БУУдагы туруктуу өкүлү 20дан ашык мектепке жана 13 медициналык мекемеге кол салынганын билдирди. Ал ошондой эле БУУга мүчө мамлекеттерди АКШнын жана Израилдин "агрессиясын айыптоого" чакырды.
АКШ президенти Дональд Трамп Ирандын 32 кемеси океандын түбүндө жатканын билдирди. Бул тууралуу ал Ак үйдө спортчу студенттер менен жолугушуу учурунда айтты.
Иран боюнча суроолорго жооп берип жатып ал АКШнын аскерлери бир жумадан берки операцияда "фантастикалык" көрсөткүчтөргө жетишип жатканын, Иран армиясы "жок кылынганын" жарыялады.
"Алардын флоту жок кылынды. Алардын байланыштары жок кылынды. Алардын лидерлеринин эки тобу жок кылынды. Үчүнчү топ гана калды. Айрым күчтөр толугу менен жок кылынды", - деди ал.
"Алардын 32 кемеси бар. 32 кеменин баары океандын түбүндө", - деп кошумчалады Трамп.
АКШнын Куралдуу күчтөрүнүн Борбордук командачылыгы (CENTCOM) бир жумадан бери уланып келаткан АКШ менен Израилдин операциясында 43 ирандык кеме бузулганын же жок кылынганын буга чейин билдирген.
Шерине