БИШКЕК. Меккеге ажылык милдетин өтөө үчүн барган кыргызстандык зыяратчылар мекенине кайта баштады. 19-январда Сауд Арабстандан кайткан учактардын алгачкысы Ошко конду. Ал эми автобус менен барган зыяратчылар да бул күндөрү жолго чыга баштады. Быйыл ажыга Кыргызстандан жалпысынан беш миң зыяратчы барган. Алардын 1600ү учак, 3400ү автобус менен барышкан. Ал эми Сауд Арабстандын визасын албай эле 20 чакты автобус менен өз алдынча жолго чыгышкан кыргызстандыктар аталган өлкөгө кире алышкан жок. Алар учурда Иорданиянын аймагында турушканы белгилүү болду. Бул тууралуу «Азаттыкка» 19-январда Кыргызстан мусулмандар муфтийи Мураталы ажы Жуманов билдирди.
