БИШКЕК. Президент Курманбек Бакиев кечээ оппозициялык күчтөрдү коркутуу жана жоошутуу аракетин жасады. Мындай пикирин Демократиялык күчтөр коалициясынын лидери Кубатбек Байболов Азаттыкка билдирди. Депутат кечээги жолугушууну диалог эмес, сокур менен дүлөйдүн жандашуусу катары сыпаттайт. Депутат Мелис Эшимкановдун айтымында, бул жолугушуу реформаларды талап кылып аткан күчтөрдүн мындан аркы пландарына эч кандай таасир этпейт. 29- апрелде чоң саясий акцияны өткөрүү боюнча штаб бүгүн жыйын куруп, иш пландарын талкуулашмакчы.
