Мындай пикирин бүгүн “Азаттыкка” берген интервьюсунда “Ата мекен” партиясынын төрагасы Өмүрбек Текебаев билдирди. Биригүү өз натыйжасын берди, анткени, иш жүзүндө 16-декабрдагы парламенттик шайлоодо бириккен партия шайлоочулардын жарымынан көп добушун алды. Бийликтин тоскоолдугунан улам мандатка ээ боло албай калган бул эки партиянын кайра бөлүнүп жатышы табийгый көрүнүш деди Текебаев. Өткөн аптада “Ак шумкар” партиясынын лидери Темир Сариев партиянын ишин кайра жандандырып жатканын жарыялаган. “Социалисттик Атамекен” партиясы оңчул, “Ак шумкар” солчул либералдык саясий уюм болуп эсептелет. “Ак шумкар” партиясын экс-депутат Кубатбек Байболов Демократиялык күчтөр биримдиги деген ат менен 2005-жылы түзгөн.
