Бүгүн экс-министр Аликбек Жекшенкуловдун соту уланып, анда күбөлөр суралары күтүлүүдө. Жекшенкулов түркиялык ишкер Сервет Четинди өлтүрүүгө катышы бар, мамлекеттик кызматтан кыянаттык менен пайдаланган деп айыпталып, 9-марттан бери Коопсуздук Комитетинин камагында отурат. Соттук териштирүүлөр 26-майда башталып, ошондон бери отурумдар ар кандай себептер менен кийинкиге жылдырылып келатат. Бул тууралуу Жекшенкуловдун адвокаты Нина Зотова “Азаттыкка” билдирди. Экс-министр жана оппозициялык саясатчы ага тагылып жаткан айыптарды саясий ишмердүүлүгү менен байланыштырып келатат. (BuS)
