Кыргызстандын Борбордук шайлоо комиссиясы шайлоодон кийин жарандардан түшкөн арыз-дооматтарды териштирүүдө. БШК мүчөсү Нурмамат Ашымовдун “Азаттыкка” билдиришинче, негизги арыздардын арасында тизмеге байланыштуу дооматтар басымдуулук кылууда. Мындан тышкары бирөө үчүн добуш берүү, документи жок шайлоого катышуу, бюллетендерди тобу менен урнага салуу фактылары боюнча да арыздар бар. Бүгүн түшкө чейин БШКнын жыйыны өтүп, анда айрым арыздар боюнча чечимдер кабыл алынмакчы. (KKs)
