ТҮРКСОЙ уюму жана түрк жазуучулары түзгөн ЕврАзия жазуучулар бирлиги Казанда өткөн Эл аралык форумда 2015-жылды Кыргыз эл акыны Омор Султановдун жылы деп жарыялады. Бул тууралуу аталган иш-чарага катышып келген жазуучу Айдарбек Сарманбетов билдирди.
Сарманбетовдун айтымында, “Түрк дүйнөсүнүн адабияты жана тарыхы” аттуу форумга 17 өлкөдөн 32 өкүл катышкан. Эми аталган иш-чаранын алкагында түрк тилдүү мамлекеттердин адабий басылмаларында Омор Султановдун чыгармалары жайылтылат.
Омор Султанов “Отузунчу станция”, “Сен жөнүндө поэма”, “Жан берели сүйүүгө”, “Адамдын турмушу” жана башка чыгармалары менен окурмандарга белгилүү. (ZA)
