Улуттар Уюмунун Адам укуктары боюнча Жогорку комиссары Кыргызстандын “чет элдик агенттер” боюнча мыйзам долбоору адам укугун коргоочу топтордун ишмердигине тескери таасир этиши мүмкүн деп, аны кайра кароого үндөдү. "Мыйзам долбоорунда тыш өлкөлөр каржылап, саясатка аралашкан коммерциялык эмес уюмдар “саясий ишмердиги аныкталбай туруп” чет өлкөлөрдүн агенттиги деп катталат" деп айтылат Жогорку комиссардын өкүлү Рупер Колвилле 26-майда жасаган билдирүүдө. "Так эмес сүйлөмдөр кызмат көрсөтчү жана адам укугун жактоочу көптөгөн жарандык уюмдарды оор абалга салышы ыктымал” деп белгиленет анда.
Береги мыйзам долбоорун Жогорку Кеңеш 27-майда талкуулай баштайт.
