Бишкекте ысык сууну жайкысын бир айга өчүрүүнү баштоо мөөнөтү так чечиле элек. Бул тууралуу бүгүн "Азаттыкка" шаардык мэриянын маалымат катчысы Гуля Алмамбетова билдирди:
- Кышкы сезон башталганга чейин жумушчу топ 2-3 жолу чогулуп, чечет. Негизи биз тараптан да, "Бишкекжылуулуктармагы" жактан да суроолор бар. Күзүндө чечим кабыл алынат.
Адатта Бишкек шаарында жыл сайын май айынын 9-10дорунан баштап ысык суу бир айга өчүрүлөт. Бул маалда түтүктөр оңдолуп, системаны тазалоо иштери жүрөт.
Өткөн айда мэрия шаардыктардан арыз түшкөнүн, анда бул иштериди июль-августта жүргүзүү өтүнүчү келтирилгенин айткан.
Ал эми "Бишкекжылуулуктармагы" ишканасы "мээ кайнаган" ысыкта жерди казып, темир түтүктөр менен иштөө өтө оор болуп каларын айтууда. (RK)