Өткөн ишембиде Кыргызстанда саясий күчтөрдүн курултайы өттү. Курултайдын жыйынтыгында экс-президент Алмазбек Атамбаевге карата бийликти узурпациялап, бир колго топтогон деген терс баа берилсе, жыйынга катышкандар учурдагы президент Сооронбай Жээнбековдун бир жылдык ишин канааттандырарлык деп табышты. Коомдук саясий күчтөрдүн курултайы максатына жеттиби же кимге курал болду? Бул суроо “Азаттыктын” “Эксперттер талдайт” берүүсүндө талданды. Талкууга курултайдын демилгечилеринин бири, саясатчы Азимбек Бекназаров, курултайды уюштуруу комитетинин мүчөсү, жарандык активист Рита Карасартова, Жогорку Кеңештин экс-депутаты Ишенбай Кадырбеков, парламенттин депутаты Рыскелди Момбеков катышты. Ошондой эле талкууга скайп аркылуу Жапониядагы Кобе университетинин магистранты, саясий талдоочу Даниел Кадырбеков кошулду.