Линктер

ЧУКУЛ КАБАР!
30-ноябрь, 2020 дүйшөмбү, Бишкек убактысы 16:53

Орусия коргоо тармагына көп акча короткон беш өлкөнүн катарына кирди


Стокгольмдогу Тынчтыкты иликтөө эл аралык институтунун (SIPRI) жаңы баяндамасына ылайык, былтыр Москванын аскердик чыгымдары 65 миллиард доллардан ашкан жана бул мурдагы жылга караганда 4,5% көп. Орусия мурдагы жылкы көрсөткүчтөрү менен былтыр бул тизмеде алтынчы орунда турган, быйыл төртүнчү орунга көтөрүлдү.

Коргоо тармагына эң көп каражат жумшаган алдыңкы беш өлкөнүн чыгымы жалпы чыгымдын 62% түзөт. Бул тизменин сап башында АКШ турат жана Вашингтондун чыгымы былтыр 732 миллиард долларды түзгөн, бул мурдагы жылга караганда 5,3% көп.

Экинчи орунду 261 миллиард доллар жумшаган Кытай ээлейт. Бул өлкөдө соңку он жылдын ичинде аскердик чыгым 85% көбөйгөн.

Индия бул тизмеде үчүнчү орунда жана Нью-Дели былтыр 71 миллиард доллар короткон. Бул 2018-жылга караганда 6,8% көп.

Бул тизмеде бешинчи орунда коргоо тармагына 61,9 миллиард доллар жумшаган Сауд Арабиясы турат, былтыр падышачылык аскердик чыгымдарын 16% кемитип, ушундан улам үчүнчү орундан бешинчиге түшкөн. Уюмдун эсебинде дүйнө жүзүндө 2019-жылы аскердик чыгымдын жалпы көлөмү 1,9 триллион долларга чамалаган. Бул 2008-жылдагы экономикалык каатчылыктан берки эң чоң көрсөткүч.

SIPRI - дүйнө өлкөлөрүнүн курал-жаракка кетирген чыгымдарын, тапкан киреше-пайдасын иликтеген дүйнөлүк илим-изилдөө институту. Ал өткөн айда соңку беш жыл ичинде дүйнөдө курал-жарак сатуу 5,5% көбөйгөнүн иликтеп чыккан. Ага ылайык, АКШ, Орусия, Франция, Германия жана Кытай курал-жарак экспорттогон ири мамлекеттер болуп эсептелет.

XS
SM
MD
LG