«Азаттык» аймактардагы кабарчылар жиберген сүрөт жана видеолор топтомун жарыялоону улантат.

Баткен

Чек ара кызматы: Кыргыз-тажик тилкесиндеги окуя жеринде иликтенүүдө, абал туруктуу

Кыргыз-тажик чек арасында абал туруктуу, кыргыз тарап Баткендин Чыр-Дөбө деп аталган жериндеги чек ара тилкесинде 6-августтун таңында болгон окуянын чоо-жайын иликтеп жатат. Бул тууралуу Мамлекеттик чек ара кызматы кабарлады.

Баласы даун синдромунан жабыркаган Элмира Сулайманова блогер катары айылдагы майып балалуу энелерге карата стигма менен күрөшүп келет. Аны соцтармактардын колдонуучулары “күн баланын энеси” деп издеп окушат. Беш баланын энеси Эльмира Сулайманова Баткендеги айылдардын биринде жашайт. Ал айыл жергесинде өзгөчө балдарды коомго аралаштыруу милдетин аткарган борбор ачкысы келет.

Нарын

Нарын облустук соту 4-августта аялын тепкилеп өлтүргөн эркекти он жылга кескен райондук соттун чечимин күчүндө калтырды. 2019-жылдын 31-декабрында Кочкор районунун Жаңы-Жол айылында 37 жаштагы келин күйөөсүнүн таягынан каза болгон.

2020-жылдын 12-майында Кочкор райондук соту кылмышка шектүүнү Жазык кодексинин 138-беренесинин 3-бөлүгүнүн 1-пункту ("Ден соолукка оор зыян келтирүү, бейбаштык максатта") менен күнөөлүү деп таап, 110 миң сом айыпка жыгуу менен 10 жылга эркинен ажыраткан. Маркум келиндин төрт баласы жетим калды.

Жалал-Абад

Жалал-Абадда 100 орундуу оорукананын курулушу жүрүп жатат, аны каржылоо маселеси чечилди.

Бул тууралуу өкмөттүн Жалал-Абад облусундагы ыйгарым укуктуу өкүлүнүн орун басары Ырысбек Ызабеков 6-августтагы брифингде билдирди. Анын айтымында, Жалал-Абад шаарындагы Түштүк аймактык жүрөк-кан-тамыр хирургиясынын изилдөө борборунун имараты да капиталдык ремонттон өткөрүлүп жатат.

Ысык-Көл

Коронавируска каршы күрөш боюнча Ысык-Көл облустук ыкчам штабынын 5-августтагы чечимине ылайык облустун кире беришине коюлган «Ак-Кеме» жана «Кызыл-Омпол» санитардык-карантиндик бекеттери алынып, бекетте нөөмөт менен иштеп жаткан медициналык, мамлекеттик, муниципалдык кызматкерлер өздөрүнүн негизги кызмат орундарына кайтып барышат.

Бул тууралуу өмөттүн Ысык-Көл облусундагы ыйгарым укуктуу өкүлү Балбак Түлөбаев билдирди.

Казакстандык спортчу Виталий Худяков Чолпон-Ата шаарынан Кажы-Сай айылына сүзүп өттү. Спортчу жалпы 56 чакырым аралыкты 13 сааттан бир аз ашыгыраак убакытта сүзүп өткөн. Ал таңкы саат 5:15те чыгып, Кажы-Сайга саат 18:30да келген. Спортчу мындай кадамы менен элдин көңүлүн Ысык-Көлгө бурдургусу келген.

Ош

5-август күнү Өзгөн шаарынан Ош шаарын көздөй келаткан жеңил автоунаа жолдун четиндеги жүк ташуучу автоунааны сүзүп, эки жүргүнчү каза болду. Кырсыкка кабылгандардын ичинен жандандыруу бөлүмүнө түшкөн дагы эки киши 6-августта көз жумду. Бир жүргүнчү оор абалда ооруканада жатат.

"Сорос-Кыргызстан" фонду облустук ооруканаларга дары-дармек каражаттарын берди

"Сорос-Кыргызстан" фонду коронавирус инфекциясын дарылоо үчүн 7 облустук бириктирилген ооруканага жана КР Өкмөтүнө караштуу ЖАМКка маанилүү дары-дармек каражаттарын сатып берди. Колдоонун суммасы 16 453 500 сомду түздү.

Дары-дармек каражаттарынын тизмесине антикоагулянттар жана антибиотиктер кирди: клексан – 3000 таңгак, эноксапарин – 3000 таңгак, гепарин – 2000 таңгак, цефепим – 15000 таңгак).

Кыргызстанда COVID-19 вирусунун пандемиясы башталгандан бери фонд жеке коргонуу каражаттарын кайтарымсыз берүү, 118 ыкчам байланыш линиясын, психологиялык жардам боюнча ыкчам байланыш ачууда көмөк көрсөтүп келүүдө.