Бишкектин Биринчи май райондук соту Кой-Таш окуясы боюнча жараянды 28-августка жылдырды. Бүгүн, 26-августка белгиленген сотко айыпталуучулар алынып келген жок. Айыпталып жаткандардын бири Кундуз Жолдубаева «Азаттыкка» камактагылардын эмне себептен сотко алынып келбегени белгисиз экенин айтты.
Жаза аткаруу мамлекеттик кызматынан (ЖАМК) айыпталуучулардын сотко келбегени тууралуу комментарий алууга мүмкүн болгон жок. Мекеменин басма сөз кызматы расмий кат жиберилгенден кийин гана маалымат берерин билдирди.
Буга чейин прокурорлор айыптоо корутундусу менен тааныштырып, айыпталуучулардын күнөөсү далилденгенин айтышкан. Экинчи тарап коюлган айыптарды четке каккан. Сотто эми күбөлөр сурала баштамак.
Коронавирус пандемиясына байланыштуу буга дейре сот онлайн өтүп, өткөн аптада аны кайра кадимки тартипте өткөрүү тууралуу чечим чыккан.
Кой-Таш окуясы боюнча экс-президент Алмазбек Атамбаев, Фарид Ниязов, Ирина Карамушкина, Асел Кодураңова, Равшан Жээнбеков, Мээрбек Мискенбаев, Кундуз Жолдубаева, Канат Сагымбаев, Марат Шаменов, Рысбек Карыпбек уулу жана башкалар айыпталып жатат.
2019-жылы 7-8-августта Улуттук коопсуздук боюнча мамлекеттик комитет (УКМК) жана Ички иштер министрлиги (ИИМ) Чүйдүн Кой-Таш айылында суракка келүүдөн баш тарткан мурдагы президент Алмазбек Атамбаевди кармоо операциясын жүргүзгөн. Анда бир офицер курман болуп, 200дөн ашуун адам жабыркаган. Окуяга байланыштуу Жазык кодексинин «Киши өлтүрүү», «Адамдын өмүрүнө кол салуу», «Барымтага алуу», «Жапырт башаламандык», «Бейбаштык», «Бийлик өкүлдөрүнө коркунуч келтирүү жана зомбулук» беренелеринин негизинде кылмыш иши козголгон.
ИИМдин Тергөө кызматы Атамбаев баштаган 19 адамга айып койгон. Алардын ичинен 14 айыпталуучунун иши сотко өткөн. Калган беш адамдын иши тергөө менен кызматташууга макул болгону үчүн өзүнчө тергелип жатат.
Сотко иши өткөн 14 айыпталуучунун ичинен Алмазбек Атамбаев УКМКнын тергөө абагында. Фарид Ниязов, Равшан Жээнбеков, Мээрбек Мискенбаев, Канат Сагымбаев, Фархат Баабиев, Канат Осмоналиев Бишкектеги №1 тергөө абагында камакта.
Парламент депутаттары Ирина Карамушкина, Асел Кодураңова, Атамбаевди колдогон КСДПнын расмий өкүлү Кундуз Жолдубаева үй камагында отурушат. Окуя боюнча ички иштер министринин мурдагы орун басары Курсан Асановго байланыштуу иш да өзүнчө каралууда.
Биринчи май райондук соту 23-июнда Атамбаевди «Батукаевдин иши» боюнча күнөөлүү деп таап, 11 жыл эки айга кескен. Сот аны сыйлыктарынан, өзүнө жана жакындарына таандык мүлкүнөн да ажыратуу тууралуу өкүм чыгарган. (NT)
