Линктер

ЧУКУЛ КАБАР!
23-октябрь, 2020 жума, Бишкек убактысы 09:18

COVID-19: Түркмөнстанда айрым дарыгерлер өз каалоосу менен жумуштан кетүүдө


Түркмөнстандык медайым иш учурунда. Март, 2020-жыл.

Расмий түрдө коронавирус тууралуу айтылбаган Түркмөнстанда дарыгерлердин COVID-19 инфекциясын жугузуп алуу коркунучу катуу болуп турат.

Бул тууралуу «Азаттык» радиосунун түркмөн кызматы билдирди. Маалыматка караганда, өлкөдө коронавирустун белгилери менен ооруканаларга жаткан медицина кызматкерлери көбөйгөн. Алардын арасында өз каалоосу менен жумуштан кеткендер да кездешет.

«Көп багыттуу ооруканада коронавирустун белгилери байкалган медайымдар менен дарыгерлер көбөйдү. Азыр оорукананын 62 жаштагы хирургу оор абалда жатат. Анын уулу менен кызы да ооруканада. Мындай абалга тынчсызданган айрым дарыгерлер, медайымдар жана санитарлар жумуштан кетүү тууралуу арыз жазып жатышат», - деди Түркмөнабад шаарындагы ооруканалардын биринин кызматкери.

Оор шарттарда иштеп жаткан медицина кызматкерлерине айлыгы да өз учурунда берилбей жатканы айтылууда.

«Лебаптагы көп багыттуу оорукананын бюджети бейтаптардын санына жараша куралат. Азыркы абалга байланыштуу ал карантиндик аймакка айлангандыктан, киреше түшпөй калды, өкмөт тараптан да колдоо жок. Кызматкерлердин маянасын төлөгөнгө акча жок болуп жатат», - деди дарыгерлердин бири.

Түркмөнстандын бийлиги өлкөдө коронавирус жуккан бир да учур жок экенин билдирип келет.

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG