Линктер

ЧУКУЛ КАБАР!
28-Январь, 2021 бейшемби, Бишкек убактысы 04:50

Кыргызстандын президенти эл аралык коомчулуктун колдоосуна таянарын билдирүүдө


Президент Сооронбай Жээнбеков. Архивдик сүрөт.

Кыргызстандын президенти Сооронбай Жээнбеков эл аралык коомчулуктун жана кыргызстандыктардын колдоосуна таянат. Бул тууралуу анын басма сөз катчысы Толгонай Стамалиева «Азаттыкка» билдирди.

«Бүгүн парламент өкмөттү бекитти. Президент ага кол коюп берди. Биз муну укук жолуна түшүүнүн бир кадамы деп баалайбыз. Белгилүү болгондой президент бүгүн эртең менен парламентке Садыр Жапаровду бардык мыйзамдарды сактап, өкмөт башчы кылып шайлоо маселесин карап чыгууну сунуш кылып кайрылды. Ал «өлкөдөгү кырдаалды турукташтыруу жана жаңы өкмөт башчыны башка мамлекеттер да таанышы үчүн бардык чечимдер легитимдүү, ал эми премьер-министр бардык мыйзамдарга ылайык бекитилиши зарыл болорун» айткан. Президенттин бул аракети - өлкөнү мыйзам жолуна түшүрүүнү улантуу», деп жазылган билдирүүдө.

4-октябрдагы парламенттик шайлоонун жыйынтыгына нааразы болгон жарандар уюштурган митинг массалык башаламандыкка айланып, митингчилер президент менен парламент отурган имаратты, УКМКны басып алышкан.

Абакта отурган бир катар саясатчыларды, алардын ичинде Садыр Жапаровду да тарапкерлери бошотушкандан бери өлкөдө саясий кризис чечилбей турат.

Айрым саясий күчтөр өкмөт башчылыкка талапкерлигин көрсөткөн Садыр Жапаровду премьер-министр кылып шайлоо аракети үч жолу болду.

6-октябрда парламенттин топ депутаты жаңы спикер шайлап, андан кийин Жапаровдун талапкерлигин өкмөт башчылыкка көрсөткөн. Бул жыйналыш парламенттин отуруму болуп саналбай турганын башка депутаттар жана жарандык коом айтып чыккан.

10-октябрда парламент депутаттары дагы бир ирет Садыр Жапаровду өкмөт башчы кылып шайлап, анын өкмөтүнүн курамын жана түзүмүн бекиткен. Бирок ал күнкү отурум жокко чыгарылып, президент Жогорку Кеңештин 10-октябрдагы токтомун кайтарып берген. 14-октябрда парламент өкмөт башчылыкка шайланган Садыр Жапаровдун өкмөт курамын, түзүмүн бекитип, ага президент Сооронбай Жээнбеков кол койгон.

Бирок Жапаровдун тарапкерлери Жээнбеков кызматтан кетмейинче тарабай турганын билдиришүүдө. 14-октябрда алардын талабы менен президентке жолугууга кирген Садыр Жапаров сүйлөшүүнүн соңунда тарапкерлеринин алдына келип, президент Жээнбеков кетерин айтты.

БУУ баштаган бир катар эл аралык уюмдар, АКШ, Британия өкмөттөрү Кыргызстандагы соңку кырдаалга кабатыр экенин билдирип, легитимдүү бийлик катары президент Сооронбай Жээнбековду тааный турганын, анын жана башка жарандык коомдун өлкөнү мыйзам жолуна салуу аракетин колдоого алышарын билдиришкен.

15-октябрда Кыргызстанга БУУнун Борбор Азия өлкөлөрү боюнча өкүлү Наталья Герман келери кабарланган. (ZKo)

Пикирлерди көрүңүз (13)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG