Улуттук коопсуздук мамлекеттик комитети (УКМК) Жогорку Кеңештин депутаты Дүйшөн Төрөкулов кармалганын билдирди. Анын үстүнөн Жазык кодексинин 319-беренеси (Коррупция) менен сотко чейинки териштирүү башталды.
Расмий маалыматка ылайык, Төрөкулов 15-январда Ош шаарында колго түшкөн. Бишкекке учак менен жеткирилген. Ал Оштогу тери иштетүүчү заводду жемкорлук жана рейдерлик жолу менен басып алган деп айтылууда. Депутаттын шериги катары Чүйдөн Жантай Шаменов да колго түшкөн.
Алар Бишкектин Биринчи май райондук сотунун чечими менен эки айга УКМКнын тергөө абагына киргизилди.
39 жаштагы Дүйшөн Төрөкулов Жогорку Кеңештеги "Бир Бол" фракциясынын депутаты. "Азаттык" азырынча шектүүлөрдүн жакындарына же адвокаттарына байланышып, комментарий ала алган жок. (SE)
