Линктер

ЧУКУЛ КАБАР!
4-Март, 2021 бейшемби, Бишкек убактысы 19:49

Клара Сооронкулова БШКга каршы сотко кайрылды


Клара Сооронкулова.

Кыргызстанда 10-январда өткөн президенттик шайлоодо талапкер болгон юрист Клара Сооронкулова Борбордук шайлоо комиссиясына (БШК) каршы Бишкек административдик сотуна арыз жазды.

Ал БШКнын «Кыргыз Республикасынын президентин кезексиз шайлоонун натыйжаларын аныктоо жөнүндө» токтомун мыйзамсыз деп табууну суранганын «Азаттыкка» билдирди.

Сооронкулованын айтымында, Садыр Жапаровдун соттуулугу болгондуктан, БШК аны өлкөдөгү эң жогорку мамлекеттик кызматка талапкер катары каттабашы керек болчу. Ал Жапаровго карата Жогорку соттун чечими бар экенин, ал кайра кароого жатпай турганын белгиледи.

Садыр Жапаров 2013-жылы «Караколдо митинг уюштуруп, Ысык-Көлдүн губернатору Эмилбек Каптагаевди барымтага алган» деген айып менен 2017-жылы камалган. 2018-жылы июнь айында ал 11 жыл, алты айга кесилген. 2019-жылы Жогорку сот анын жаза мөөнөтүн 1,5 жылга кыскартып, 10 жылын калтырган.

2020-жылы октябрда парламенттик шайлоодон кийинки нааразылыктын шартында түрмөдөн чыккан Садыр Жапаров премьер-министр жана президенттин милдетин аткаруучу болуп иштеди. Кийин кызматын убактылуу тапшырып, 10-январга белгиленген президенттик шайлоодо талапкер болду.

Жогорку соттун басма сөз кызматы Садыр Жапаровдун акталганын 20-октбярда кабарлаган.

17 талапкер катышкан президенттик шайлоодо Садыр Жапаров шайлоого катышкан элдин 80% жакын добушун алып, анын жеңгенин БШК 21-январда расмий жарыялаган.

Шайлоонун эртеси Бишкекте Жапаров шайлоого өзү менен кошо ат салышкан атаандаштарынын саясий салмагын, кадыр-баркын, тажрыйбасын жогору баалай турганын айтып, аларды кызматташууга чакырган. Ошондой эле ал сөз эркиндигин коргоого убада берген. (SE)

Пикирлерди көрүңүз (10)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG