Премьер-министр Улукбек Марипов бүгүн - 25-мартта иш сапары менен Өзбекстандын борбору Ташкент шаарына барды.
Өкмөттүн басма сөз кызматы кабарлагандай, ал Өзбекстандын президенти Шавкат Мирзиёев менен жолугуп, өкмөт аралык комиссиянын тогузунчу отурумуна катышат. Мындан тышкары Марипов Ташкенттеги айрым ишканаларды кыдырат.
Кыргыз делегациясынын курамына бир катар мекемелердин жетекчилери кирди.
Бул күндөрү Ташкентте Кыргызстан менен Өзбекстандын мамлекеттик чек арасын делимитациялоо жана демаркациялоо боюнча өкмөттүк делегациялардын сүйлөшүүсү да өтүүдө. Ага Кыргызстандан Улуттук коопсуздук боюнча мамлекеттик комитетинин (УКМК) төрагасы Камчыбек Ташиев жана башка жооптуу кызматкерлер катышууда.
Өзбекстан менен 2017-жылдагы макулдашуунун негизинде ортодогу чек ара сызыгынын 1170 чакырымы (85%), ал эми андан кийин дагы 10% жакыны такталган. (RK)
