2020-жылы Кошмо Штаттарда жарандар киши колдуу болгон учурлар бир жыл мурдагыга салыштырмалуу дээрлик 30% көбөйгөн. Бул каттоо башталган 1960-жылдан бери бир жылдык статистикадагы эң чоң секирик.
Федералдык иликтөө бюросу 27-сентябрда жарыялаган маалыматка ылайык, АКШда былтыр 21 570 адам өлтүрүү фактысы катталды. Бул 2019-жылга салыштырмалуу 4901 фактыга көп.
Былтыр адам өлтүрүү фактыларынын 76% ок атуучу курал-жарактар себеп болгон. 2019-жылы бул көрсөткүч 73% түзгөн.
Эксперттер кылмыштуулуктун күчөшүнүн себептерин так айта албай турушат. Алардын баамында коронавирус пандемиясынан улам жаралган экономикалык жана социалдык кыйынчылыктар жана курал-жарак соодасынын күчөшү киши өлтүрүү фактыларынын көбөйүшүнө себеп болушу мүмкүн. Ошондой эле, афро-америкалык жаран Жорж Флойддун өлүмүнөн кийин айрым аймактарда полиция кызматкерлеринин санынын азайышы да кылмыштуулуктун дагы бир себеби катары белгиленип жатат.
Соңку сандар Америкада киши өлтүрүү 1990-жылдардан берки эң жогорку чегине жеткенин көрсөтүүдө. Ал кезде кокаин эпидемиясы жана кылмыштуулук күч алганы үчүн бир жылда 23 миңдей киши өлтүрүү фактылары катталган.
Facebook шеринеси