Линктер

ЧУКУЛ КАБАР!
29-Май, 2024-жыл, шаршемби, Бишкек убактысы 20:48

Журналисттер сөз эркиндигине байланыштуу бийликке кайрылды


Журналист Болот Темировду колдогон митингден. 24-январь, 2022
Журналист Болот Темировду колдогон митингден. 24-январь, 2022

Журналисттик коомчулуктун өкүлдөрү сөз эркиндигине байланыштуу кайрылуу жолдоду. Анда журналисттер демократиялык коомдун принциптеринен жана баалуулуктарынан четтөө өңдүү тынчсыздандырган көрүнүштөр болуп жатканын белгилешкен. Ошондой жалпыга маалымдоо каражаттарына жана сөз эркиндигине туш тараптан жапырт чабуул коюлуп жатканын айтышкан. Бул аракеттер айрым мыйзамдарды кабыл алуу, ири суммадагы доо арыздар, оозеки коркутуулар, мыйзамсыз кармоо жана суракка чакыруу аркылуу ишке ашып келатканына токтолушкан.

"Журналисттердин материалдары коомчулук чындап эмне болуп жатканын билип, түшүнүшү үчүн көмүскөдө болуп жаткан мыйзам бузууларды ачып берет, ал эми укук коргоо органдары ошол мыйзам бузууларга чара көрүү функциясын аткарууга тийиш. Бирок биз тескери реакцияга күбө болуп жатабыз – иликтөөлөрдүн авторлору кылмыш иштеринин объектисине айланууда, укуктук жол-жоболор одоно мыйзам бузуулар менен коштолуп жатат. Социалдык тармактарда “троллдор фабрикалары” тарабынан журналисттердин дарегине жапырт басым болууда, иликтөөчү журналисттердин артынан аңдып, жеке турмушуна кийлигишип, видео байкоо жүргүзүп жатышат. Бийликтен сурагыбыз келет – силер үчүн кылмышкер жана мыйзам бузуучу деги ким? Мыйзамды бузган кишиби же чындыкты айткан адамбы?", - деп жазылган анда.

Кайрылууда айтылгандай, журналисттер ар дайым коомчулуктун, элдин кызыкчылыгын көздөйт. Аларды өлкөдөгү жумушсуздук, коррупция, саламаттык сактоо, экономиканын абалы, жарандардын кирешесинин аздыгы, билим берүүнүн сапаты, социалдык кызмат көрсөтүүлөр жана жеңилдиктер, суунун тартыштыгы, турак жай шарттары тынчсыздандырат жана ушул темаларды көтөрүп чыгышат.

"Бийликти, бир катар аткаминерлердин бийликке жакын тарапташтарын жалпыга маалымдоо каражаттарына жана журналисттерге карата социалдык тармактарда жапырт чабуулдарды токтотууга, коомчулуктун көңүлүн журналисттер ачып жаткан көйгөйлөрдөн башка жакка бурбоого, журналисттерди каралап, талкуунун темасын өзгөртүү максатында аларды аңдып, жеке жашоосуна байланыштуу видеолорду туш тарапка жайылтууну токтотууга чакырабыз", - деп айтылат кайрылууда.

Мындан тышкары алар журналисттерге чабуул жасагандардын артында кимдер турганын билерин, соцтармактардагы “троллдорго” ким ээлик кылып, аларды кимдер башкарып жатканынан да кабардар экенин айтышкан. Ошондой эле мындан ары дагы өз милдеттерин аткара беришерин билдиришкен.

Бир апта мурун журналист Болот Темиров жана анын командасы Улуттук коопсуздук комитетинин (УКМК) төрагасы Камчыбек Ташиевдин жакын тууганынын аты аталган журналисттик иликтөө жарыялаган. "Эки күндө 37 млн. сомду кантип тапса болот? Садыр Жапаров жана Ташиевдин схемасы" деген темадагы материалда "Кыргыз Петролеум Компани" мамлекеттик ишканасы “Регион Ойл” деп аталган компанияга мазут сатканы, жеке компания мазутту сыртка экспорттоп, эки күндүн ичинде 37 миллион сом тапканы айтылган. Ташиев менен анын жакындары дооматтарды четке каккан.

Иликтөө жарыялангандан көп өтпөй анын автору Болот Темировду жана аны менен иштешкен төкмө акын Болот Назаров баңгизатка байланыштуу айыпталып кармалып, коомчулуктун нааразычылыгынан кийин үй камагына чыгышкан.

Андан көп өтпөй журналисттин жеке жашоосуна байланыштуу аудио-видео материалдар социалдык тармактарга чыккан.

Facebook шеринеси

XS
SM
MD
LG