АКШнын мамлекеттик катчысы Энтони Блинкен Украинанын Одесса портуна орусиялык күчтөрдүн сокку урушун айыптады.
Муну менен Москва Стамбулда кол коюлган дан экспорттоого тоскоолдук кылбоо тууралуу макулдашууну бузганын айтты.
Блинкендин билдирүүсүндө, дүйнөлүк азык-түлүк кризисинин тереңдешине Орусия жооптуу. Ал Кремлди өз агрессиясын тез арада токтотууга, буга чейин макул болгон келишимдин шарттарын аткарууга чакырды.
Москва менен Киевдин расмий өкүлдөрү Түркия жана Бириккен Улуттар Уюмунун (БУУ) ортомчулугу менен Украинада бир нече айдан бери токтоп турган буудай экспортун кайра жандантуу келишимине 22-июлда кол койгон.
Андан бир күн өтө электе Орусия Одессадагы портко ракетадан сокку урган.
Украина Орусияны Кара деңиздеги порттордон дан экспорттоо тууралуу Стамбул макулдашуусун үзгүлтүккө учуратууга аракеттенди деп айыптады.
Киевдин мындай билдирүүсү Одессадагы портко ракета тийгенден кийин жасалды.
Украинанын президенти Владимир Зеленский Казакстандын мамлекет башчысы Касым-Жомарт Токаев менен телефон аркылуу сүйлөштү.
Украинага дагы төрт даана HIMARS системасы берилет
Кошмо Штаттары Украинага берилчү аскердик жардамдын кезектеги 270 млн. долларлык пакетин жактырды. Анда украиналык армияга төрт даана HIMARS системасын берүү да каралган. Ошону менен Украинага берилген бул таамай атуучу, реактивдүү артиллериялык системанын саны жыйырмага жетет.
Ак үйдүн өкүлү Жон Кирби бул чечим Украинанын аймагын орус аскерлери токтоосуз аткылап, карапайым тургундар набыт болуп, шаарларга, айылдарга жана жарандык инфраструктурага зыян келтирилгенине байланыштуу кабыл алынганын билдирди.
HIMARS системасы украин армиясынын жогорку баасына ээ болду. Аларды жеткиргенден кийин украин армиясы орус аскерлеринин ок-дары кампаларына жана башка аскердик объектилерине чабуул жасай баштады.
Украинанын Коргоо министри Алексей Резников душмандын мизин кайтаруу үчүн мындай системанын санын көбөйтүп, жүзгө жеткирүү керек деди.