Орусиянын тышкы иштер министринин орун басары Сергей Рябков билдиргендей, Москва камактагыларды айырбаштоо боюнча Вашингтон менен келишим түзөрүнө үмүттөнөт.
Рябковдун айтымында, камакта жаткан жарандар арасында курал-жарак соодасы үчүн соттолгон орусиялык Виктор Бут дагы бар. Ал Америка түрмөсүндө 25 жылдык жаза мөөнөтүн өтөп жатат.
"Америкалыктар сыртынан активдүүлүк көрсөтүшүүдө, ал эми биз бул үчүн түзүлгөн атайын канал аркылуу иштеп жатабыз", - деди Рябков журналисттерге 18-ноябрда.
Польшанын ракета түшкөн аймагында украиналык адистер иштеп жатат. Бул тууралуу 18-ноябрда Украинанын тышкы иштер министри Дмитрий Кулеба Твиттерге жазды.
Ал 15-ноябрда болгон окуя боюнча Украина Польша менен "ачык жана конструктивдүү" кызматташууну улантарын кошумчалады.
НАТОго мүчө Польшанын бийлиги жана Батыш мамлекеттери баштапкы маалыматтарга таянып, эки кишинин өмүрүн алган жардырууга Украинанын абадан коргонуу системасы себеп болгонун белгилеп жатышат. Алардын пикиринде, орус күчтөрүнүн аба чабуулдарынын мизин кайтаруу максатында атылган ракета өз багытынан жаңылып, Польшанын аймагына түшкөн болушу мүмкүн.
Украинанын президенти Владимир Зеленский аскерлери фронттун бардык тарабында жеңишке жетишип келе жатышканын, айрым аймактарда "келечектеги жеңиштер" даярдалып жатканын айтты.
Ал 18-ноябрдын кечиндеги жасаган кайрылуусунда Донецкиде кызуу салгылашуу болуп жатканын айтты.
"Кечээ эле Донецкиде Орусиянын жүздөй ракетасы атып түшүрүлдү. Донбасста позицияларды ээлеп турган бардык аскерлерибиз - чыныгы баатырлар", - деди Зеленский.
17-ноябрда Украинанын Запорожье облусунун Вольнянск шаарында орус аскерлеринин аткылоосунан жети адам каза болду. Жергиликтүү бийлик Орусиянын ракетасы турак жайга тийгенин билдиргенин “Азаттыктын” орус кызматы жазды.
Украинанын президентинин аппаратынын жетекчисинин орун басары Кирилл Тимошенко курмандыктардын саны мындан да көп болушу мүмкүн экенин, урандыларды тазалоо иштери жүрүп жатканын айтты.