Кошмо Штаттар Украинага 400 миллион долларга кошумча аскердик жардам жөнөтөт. Бул тууралуу Associated Press Ак үйдөгү булактарына таянып жазды.
Маалыматка караганда, анын алкагында Киевге чалгын чогултуу үчүн колдонулган Hornets нано-дрондору, HIMARS реактивдүү системалары, танктарга каршы колдонулчу "Стингер" жана "Жавелин" зениттик ракеталары, Hydra-70 жер-аба ракеталары, "Страйкер" оор аскердик техникасы берилет.
Бул курал-жабдык атайын президенттик программанын алкагында бир нече күндүн ичинде жөнөтүлөт. Бул схема Байденге Конгресстин макулдугу жок эле каражат бөлүүгө шарт түзөт. Орусия Украинага толук кандуу согуш ачкандан бери Вашингтон Киевге 41 миллиард доллардан ашуун каражатка жардам көрсөттү.
Литва Европа Биримдигине дан ташуу үчүн кошумча жол катары Балтикадагы портторду колдонууну сунуштады. Бул тууралуу AFP агенттиги Европа Комиссиясына жолдонгон катка шилтеме кылып жазды.
Анда үч литвалык министрдин катында Орусиянын дан келишиминен чыгышы жана Одессадагы портторго жасаган чабуулу дүйнөдөгү ансыз дагы оор болуп турган азык-түлүк коопсуздугуна байланыштуу жагдайды ого бетер начарлатары жазылган. Балтикадагы порттордо күн сайын 25 миллионго чейин тонна дан жөнөтүүгө мүмкүн экени, украианалык айыл чарба азыктарын ташууга "ишенимдүү альтернативдүү жол" болушу мүмкүн экени көрсөтүлгөн.
Өткөн аптада Клайпеда деңиз портунун башчысы Альгас Латакас Литванын башкы порту аркылуу 10-15 миллион тоннага чейин дан ташууга мүмкүндүгүн билдирген, бирок жүктү Балтика деңизине жеткирүү машакат экенин белгилеген.
Мунун алдында НАТОнун баш катчысы Йенс Столтонберг аталган альянс менен Украинанын кеңеши 26-июлда жыйынга чогулуп, Кара деңиз аркылуу дан ташуу маселесин талкуулай тургандыгын билдирген.
НАТО-Украина кеңеши ушул айдын башында, 12-июлда альянстын Брюсселдеги саммитинде негизделген.
Украина – дан азыктарын ири көлөмдө экспорттогон өлкө. 2022-жылы февралда Орусия Украинага кол салгандан кийин анын Кара деңиздеги портторун флот аркылуу бөгөттөп, Киевдин дан азыктарын экспорттошуна мүмкүнчүлүк бербей койгон.
2022-жылы 22-июлда Стамбулдагы сүйлөшүүлөрдө Украина, Орусия жана Түркия Бириккен Улуттар Уюмунун ортомчулугу менен дан экспортун кайра жандантуу боюнча келишкен эле. Украина Түркия жана БУУ менен өзүнчө келишимге кол койгон. Ал эми ушул келишимди Орусия тарап Түркия жана БУУ менен өзүнчө түзүп, милдеттенме алышкан.
БУУнун маалыматына караганда, ошондон бери Украинанын түштүк портторунан чыккан кемелер текшерүү үчүн Түркияга токтоп, миллиондогон тонна азык-түлүктү дүйнөнүн башка өлкөлөрүнө ташып турган. Бирок дан келишими үч жолу узартылды. Соңку келишимдин мөөнөтү 17-июлда аяктап, Москва аны узартуудан баш тарткан.
Орус армиясы Украинанын баш калаасы Киевди 25-июлга караган түнү дрондор менен аткылаганын жергиликтүү бийлик шейшемби таңда билдирди.
Калаанын аскердик администрациясынын жетекчиси Сергей Попко билдиргендей, дрондорун баары абадан атып түшүрүлгөн.
"Коркунуч тууралуу эскертүү үч саатка созулду. Душман Иранда чыгарылган "Шахед" дрондорун колдонду. Бул ай башынан бери баш калаага жасалган алтынчы чабуул. Учкучсуз аппараттардын баары Киевге жете электе эле аныкталып, жок кылынды", - деп жазды Попко. Ал жабыркагандар жана курман болгондор жок экенин кошумчалады.
Ал арада Донецк облусунун губернатору Павел Кириленко 25-июлдун таңында билдиргендей, Константиновка шаарын бир күн мурунку аткылоодон өмүрү кыйылгандардын саны өстү.
24-июлда жергиликтүү тургундар түшүп жаткан көлгө жасалган аба чабуулдан эки киши мерт болгон. Анын бири он жаштагы бала. Жети адам, анын ичинде төрт бала жараат алган.
Кириленко аткылоодо кассеталык ок-дарылар колдонулганын кабарлады. Бул сөздөрдүн чын-төгүнүн көз карандысыз булактардан ырастоо мүмкүн эмес.
Украин күчтөрү Бердянск жана Мелитополь багыттарында контрчабуулун улантканын коргоо министринин орун басары Анна Маляр билдирди. Ал соңку бир аптада украин аскерлери өлкө түштүгүндө 12 чакырым жерди орус күчтөрүнөн бошотконун кошумчалады.
Донецк облустук администрациясынын башчысы Павел Кириленко 24-июлда кечинде Орусиянын чабуулунун Константиновкада эки адам мерт болгонун, анын бири 10 жаштагы бала экенин билдирди. Андан сырткары жети адам жараат алды, арасында төрт бала бар.
Кириленконун ырасташынча, орусиялык армия чабуулда кассеталык бомбасы бар "Смерч" реактивдүү системаны колдонгон.
Киевдин бийлиги 25-июлга караган түнү дагы шаарга "Шахед" дрондору менен чабуул жасалганын, учкучсыз аппараттардын баары атып түшүрүлгөнүн, жабыркагандар жана жараат алгандар болбогонун кабарлады.
Шаардын аскердик администрациясынын башчысы Сергей Попко чабуул дээрлик үч саатка созулганын, ушуну менен бул айда шаарга алтынчы ирет дрондон кол салуу болгонун айтты.
Украинанын бир катар аймактарында шейшембиге караган түнү абадан эскертүү берилди.
Согуш маалында бул маалыматтарды бейтарап булактардан тактоо мүмкүн эмес. Москва чабуулдарга байланыштуу комментарий берген жок.