Москвадан анча алыс эмес жайгашкан Сергиев Посад шаарындагы Загорск оптико-механикалык заводундагы жарылуудан кийин он эки киши дайынсыз болууда. 9-августта болгон жарылууда бир киши мерт кетип, элүүдөн ашуун киши жаракат алды. Алардын бешинин абалы оор.
Өзгөчө кырдаалдар министрлиги урандылардын алдынан адамдарды издөө иштери уланып жатканын билдирди.
"База" телеграм-каналы булагын көрсөтпөстөн түнү урандылардын алдынан үч кишинин сөөгүн алып чыгышканын жазды. Бул маалыматтын чын-төгүнүн ырастоо мүмкүн эмес.
Жарылууга эмне себеп болгону азырынча так белгисиз. Расмий бийликтин өкүлдөрү билдиргендей окуя пиротехника сакталган кампада болгон. 10-июлда Орусиянын Тергөө комитети кампаны ижарага алып иштетекен "Пиро-Росс" компаниясынын техникалык директору кармалып, анын кеңсесинде тинтүү жүргөнүн билдирди. Жарылуу боюнча кылмыш иши козголду.
Кармалган адамдын аты-жөнү так айтылбаганы менен, маалымат каражаттары кеп Сергей Чанкаев тууралуу болуп жатканын жазышууда. Ал 9-августта жарылуу пиротехника сакталган кампада эмес, анын жанында болгонун айткан. Ошондой эле жарылуунун алдында дрондукуна окшош үн укканын билдирген.
Украин бийлиги Орусиянын армиясынын аткылоосу күч алгандыктан Харьков облусундагы Купянск районуна караштуу 37 калктуу конуштун тургундарын милдеттүү түрдө коопсуз жакка чыгарып кетүүнү буйруду.
Тиешелүү документ Купянск шаарынын аскердик башкармалыгынын Телеграм-каналына жарыяланды.
Харьков облусунун губернатору Олег Синегубов 11 киши эвакуацияланарын билдирди. Ал түнкү аткылоодон Купянскидеги шаардык кеңештин имараты жабыркаганын кошумчалады.
Бир нече аптадан бери Купянскинин тегерегинде айыгышкан салгылаш болуп жатканы кабарланып келген.
10-августта украин армиясы билдиргендей, аскерлер чыгышта Бахмут, түштүктө Мелитополь жана Бердянск багыттарында контрчабуулун улантып жатат.
Баяндамада орус күчтөрү катуу каршылык көрсөтүп, кошумча аскерлерди жөнөткөнү жана резервдегилерди активдүү колдонуп жатканы белгиленген.
Ал арада Запорожьеге 9-августтун кечинде жасалган чабуулдан мерт кеткендердин саны үчкө жетип, алты адам жараат алганы маалымдалды.
Орусиянын Коргоо министрлиги менен Москва шаарынын мэри Сергей Собянин эки түн катары менен абадан коргонуу системасы баш калаага багытталган дрондорду атып түшүргөнүн билдирди.
Купянск районун украин күчтөрү былтыр орус аскерлеринен бошоткон.
Харьковдон 120 чакырым алыс Купянск шаары Украинанын чыгышындагы транспорттук түйүн болуп саналат жана Донбасстагы орусиялык күчтөрдү жабдуу үчүн стратегиялык мааниге ээ.
Орусиянын баш калаасынын мэри Сергей Собянин абадан коргонуу системасы Москвага багыттылган эки учкучсуз аппаратты атып түшүргөнүн билдирди.
"Таңкы саат төрттөрдө абадан коргонуу системасы калааны көздөй учуп келаткан эки учкучсуз аппаратты атып түшүрдү. Бири Калуга облусунда, бири Борбордук айланма автожолдун аймагында (ЦКАД)", - деп жазды мэр Телеграм-каналына.
Москвадагы Внуково жана Домодедово аэропортторунда 10-августка караган түнү учууларга чектөө киргизилгенин РИА Новости агенттиги жазды.
Flightradar24 сервисинин маалыматына ылайык, жалпысынан ондогон каттамдар токтотулган же жылдырылган.
Baza Телеграм-каналы Внуково аэропортунда түнкүсүн "Килем" планы киргизилгенин жазды. Мындай план Орусиянын мамлекеттик чек арасын аба кемеси мыйзамсыз кесип өткөндө же аба майданда кандайдыр бир белгисиз объект пайда болгондо киргизилет.
Ал эми ASTRA Телеграм-каналы Домодедово районунда түнкүсүн жардыруу жана катуу өрт чыкканын кабарлады. Жергиликтүү тургундар эки жарылуунун үнүн укканын билдиришкен.
Москва облусунун Өзгөчө кырдаалдар башкармалыгы өрт автосервистин аймагында тутанганын, тилсиз жоо миң чарчы метр аянтты каптаганын билдирди. Өрттүн чыгышына эмне түрткү болгону кабарланган жок.
9-августта дагы Москванын бийлиги борбор калаада эки дрон атып түшүрүлгөнүн билдирген.
Орусия түндө Харьков облусун аткылады
Харьков облусунун аскер администрациясынын башчысы Олег Синегубов 10-августка караган түнү орус армиясы Купянскинин борборуна авиабомба менен сокку урганын билдирди. Жыйынтыгында шаардык кеңештин имараты талкаланды. Таң эрте шаар аткыланып, эл жашаган сектордо өрт чыкты, эки адам каза тапты.
Облустук аскер администрациясынын башчысы Купянск районунун калктуу пункттарынан милдеттүү эвакуация иштерин жүргүздү.
"Душман эл жашаган аймакта фронттун линиясына жакын аткылоону күчөттү, абадан сокку уруп жатат. Мындай шартта адамдардын ден соолугуна жана өмүрүнө коркунуч туулду" деп айтылат Синегубов.
Украин армиясы орусиялык күчтөр 2022-жылы күз айында оккупациядан бошотулган Купянск районуна кайрадан чабуул коюу үчүн куралдуу топторду даярдап жатканын билдирди.