Орусиялык армия Херсон облусундагы Берислав шаарына дрон менен сокку урду. Облустун аскердик администрациясынын башчысы Александр Прокудин аткылоодон бир адам каза таап, дагы бирөө жараат алганын билдирди. Учурда жабыркаган адамга жардам көрсөтүлүүдө.
Украинанын өзгочө кырдаалдар боюнча мамлекеттик кызматы өткөн суткада Херсон облусуна ар кандай үлгүдөгү 41 снаряд атылганын, жыйынтыгында бир имарат, гараж жана автомобилдер жабыркаганын билдирди.
.
Украинанын куралдуу күчтөрү орусиялык беш учкучсуз учакты жок кылганын билдирди
8-декабрга караган түнү Украинанын аймагына орусиялык күчтөр "Шахед" үлгүсүндөгү жети учкучсуз учак жана алты С-300 ракетасы менен чабуул койду.
Бул тууралуу Украинанын аскер-аба күчтөрү билдирди. Дрондор Днепропетровск облусуна, С-300 – Харьков облусуна карай учурулган. Мекеменин маалыматында беш учкучсуз учак жок кылынды.
Аткылоодон Харьковдо эки адам жарадар болгонун аймактык администрация башчысы Олег Синегубов билдирди. Турак үйлөргө, окуу жайларга жана 20 автомобилге зыян келтирилген. Андан тышкары Купянск районундагы Куриловка кыштагы аткылоого кабылып, анын айынан беш кабаттуу үйдө өрт чыкты.
Днепропетровск облусундагы Павлоградск районуна урулган соккудан бир адам каза таап, төртөө жабыркады. Бул тууралуу аймактык аскердик администрациянын башчысы Сергей Лысак билдирди. Анын айтымында, жабыркагандар ооруканага жеткирилди, эки адамдын абалы оор.
Орусияда орус жарандыгын жакында алган 350дөй адам армияга жөнөтүлгөн. Бул тууралуу Baza Телеграм-каналы билдирди.
Акыркы кезде полициянын, аскер комиссариатынын жана Тергөө комитетинин кызматчылары кампаларды, курулушту, кеңселерди кыдырып, жапырт "кармоо" ишин баштаганы айтылган. Ага ылайык, жарандык алып, бирок аскердик каттоого турбагандар кармалып, адегенде полиция бөлүмүнө, анан аскер комиссариаттарына жеткирилери маалым болгон.
Украина америкалык "Вампирлерди" алат
АКШ Украинага учкучсуз учактар менен күрөшүү үчүн Vampire ("Вампир") системасынын 14тү берет. Бул тууралуу АКШнын Аскер-аба күчтөрүнүн башкармалыгы билдирди. Буга чейин украиналык аскерлер мындай системадан төрттү алган.
Vampire – телекамера жана тепловизор менен жабдылган мобилдик зениттик комплекс. Аны APKWS зениттик ракеталарын атуу үчүн колдонушат. Бул жаңы ойлоп табылган жабдык, "Вампирлер" сыноодон биринчи жолу 2021-жылы өткөн.
Ал арада Вашингтондо өткөн АКШ жана Украинанын коргоо индустриясынын жыйынында аскердик өндүрүш боюнча меморандумга кол коюлган. Бул тууралуу Украинанын президентинин кеңсесинин башчысы Андрей Ермак билдирди. Анын айтымында, жаңы өндүрүш Украинанын аймагында жайгашмакчы.
Украинанын стратегиялык өндүрүшү боюнча министр Андрей Камышин кеп 155-миллиметрлик артиллериялык снаряддар тууралуу болуп жатканын тактады. Украина армиясы учурда курал-жарактан өксү болууда. Өлкөнүн бул каруу-жаракты жасаган өз өндүрүшү жок. Министрдин айтымында, өндүрүштү ишке киргизүүгө эки-үч жылдык убакытты алат.