Украинанын Куралдуу күчтөрүнүн жетекчиси Александр Сырский 30-июнда журналисттерге курган маегинде Орусиянын Брянск облусунан Украинанын Чернигов облусуна чабуул коюп жана андан ары Киевди карай жылуу коркунучу реалдуу экенин билдирди.
Анын айтымында, Орусиянын президенти Владимир Путин Башкы штабга мындай операциянын ар кандай варианттарын иштеп чыгууну тапшырган.
Сырский бул операция менен Орусия Украинанын аймагына тереңирээк кирип жана украин армиясынын бир бөлүгүн негизги багыттардан, айрыкча түштүктөн алаксытууну көздөп жатканын айтты.
"Алар аскерлеринин саны менен фронт тилкесин кеңейтип, бизди резервдерден ажыратууга аракет кылууда", - деди Сырский.
Маек учурунда Александр Сырский Орусияда Беларустун аймагынан чабуул жасоо варианты да барын айтты. Бирок Сырский Минск орусиялык күчтөргө Беларустун аймагын кайрадан аскердик плацдарм катары пайдаланууга макул болооунан күмөн санай турганын билдирди. Бул тууралуу РБК-Украина жазды.
Александр Сырскийдин айтымында, Беларус менен Украинанын чек арасына орнотулган ретрансляторлордун бири 29-июнда иштетилген.
"Алар азырынча демонтаждала элек. Кечээ бир ретрансляторлор иштетилди. Менимче, мындан ары иштетилбейт. Мен баарын айта албайм, бирок алар (беларус бийлиги) бул ретрансляторлор иштебеши керек экенин жакшы түшүнөт", - деген Сырский "Настоящее Времяга".
24-июнда Украинанын президенти Владимир Зеленский 22-июндан тартып Беларус менен Украинанын чек арасындагы орусиялык дрондорду багыттоого жардам берген ретрансляторлор иштебей калганын билдирди. Буга чейин Зеленский Минскиден бул жабдууларды алып салууну талап кылып, антпесе аларды жок кылуу чаралары көрүлүшү мүмкүн экенин эскерткен.
Орусия башка өлкөлөрдөн мунай продукциясын ташып келүү ыктымалдыгын талкуулап жатат. Кремлдин басма сөз катчысы Дмитрий Песков тараптар баа боюнча мунасага келсе, Москва чет жактардан күйүүчү май импорттоого даяр деп билдирди.
Бирок кеп кайсы өлкөлөр тууралуу жүргөнү айтылган жок.
«Муну менен рынокту турукташтырууга жана ажиотаж болуп аткан талапты жөнгө салууга дагы бир кадам жасайбыз», - деп айтты Песков.
24-июнда Рейтер агенттиги булактарына таянып, Орусия Казакстандан 50 миң тоннага жакын АИ-92 үлгүсүндөгү бензин жеткирүү боюнча сүйлөшүүлөрдү жүргүзүп жатканын жазган.
Казакстандын бийлиги ошондо мындай сүйлөшүүлөр жүрүп жатканын расмий четке каккан.
Өлкөнүн энергетика министри Ерлан Аккенженов 26-июнда Москвадан күйүүчү май жеткирүү боюнча расмий кайрылуу түшпөгөнүн, андай өтүнүч түшсө, өкмөт аны караштырарын айтты.
Агенттиктин маалыматына ылайык, быйыл Орусияда бензин өндүрүшү былтыркыга салыштырмалуу болжол менен 25% азайды.
Украина өз аймагын күн сайын аткылаган орус армиясын күйүүчү май менен камсыздаган энергетикалык комплекстерди бутага алып келатат.
Соңку соккулардан улам Орусияда бензин менен дизел тартыш болгону кабарланууда. Москва күйүүчү майдын экспортун чектеди жана кара майды импорттоону караштырууда.
Москва жана Подмосковьенин бийликтери өткөн түнү украин дрондору жапырт чабуул койгонун билдиришти. Москванын мэри Сергей Собяниндин айтымында, 56 дрон атып түшүрүлгөн жана зыянсыздандырылган.
Собяниндин билдиришинче, дрондун сыныктары кулаган жерде чукул кызматтар иштеп жатат. Жабыр тарткандар тууралуу маалымат жок.
Росавиациянын маалыматында, Домодедово жана Жуковский аэропортторунун ишине чектөөлөр кирди. Украинанын Exilenova+ мониторинг каналы жергиликтүү тургундарга таянып Подмосковьедеги Дубнеде жарылуулар болгонун билдирди.