Кармалган активисттердин бири Рита Карасартова Горький гүлбагында митинг өткөрүүгө тыюу салынбаганын айтып, чечимди көрсөтүүнү талап кылды.
Ал эми укук коргоочу Өндүрүш Токтонасыров президент Садыр Жапаров өзү Фейсбуктагы баракчасында "Горький паркында кааласаңар 24 саат бою митингге чыга берсеңер болот" деп жазганын эске салды. Жыйынтыгында активисттерди милиция автобуска салып алып кетти.
Горький гүл багына чогулган жарандык активисттер "Согушту токтот", "Согушка жол жок", "Путин, согушту токтот" деген жазууларды кармап турган. Аларга милиция кызматкерлери келип, "Путин фашист" деген жазуусу бар плакатты алып салууну талап кылышты.
Милиция 1-июлга чейин митинг, пикет өткөрүүгө тыюу салган соттун чечими эске салып, тарап кетүүнү талап кылды.
Бирок ушул эле гүлбакта бир нече саат мурда Орусияны колдогон он чакты адам митингге чыккан. Аларга милиция да, бийлик өкүлдөрү да тыюу салынган чечим бар экенин айткан эмес.
Президент Садыр Жапаров 1-апрелде Фейсбуктагы баракчасында билдирүү жазып, пикет, митинг, акцияларды чет өлкөлөрдүн элчиликтеринин алдында өткөрбөөгө чакырган. Мамлекет башчы бул үчүн Горький паркы бар экенин, ал жерде "кааласа 24 саат жатып алса болорун" жазган.
Мамлекет башчы Фейсбук баракчасындагы билдирүүсүндө Бишкекте Орусия менен Украинага байланыштуу акцияларга үч айга тыюу салынганы боюнча пикирин билдирген эмес.
Бишкекте орус-украин согушуна байланыштуу тынч жыйын, митинг же башка акция өткөрүүгө 1-июлга чейин тыюу салынган. Мындай чечимди борбор калаанын төрт райондук соту мыйзамдуу деп тапканын Жогорку соттун басма сөз кызматы кабарлаган.
Бирок бул чектөө борбордук Ала-Тоо аянтында мамлекеттик жана муниципалдык расмий иш-чараларды өткөрүүгө тийиштүү эмес.
Орусия Украинага 24-февралда кол салган. Бир айдан ашуун созулган согушта Украинанын бир катар шаарлары талкаланды, 4 миллиондон ашуун киши качкынга айланды. Расмий Бишкек согуш башталгандан бери бейтарап позицияда экенин айтып келет. Буга чейин борбордо эки тарапты тең колдогон митингдер өткөн. (ZKo)
Facebook шеринеси