Бишкектин четиндеги Ак-Ордо конушунда үйү түрттүрүлүп, төрт баласы менен көчөдө калган Марал Шаболотованын үйү кайра салына баштады. Бул тууралуу ал "Азаттыкка" өзү кабарлады. Анын ырасташынча, үйүнүн жерин талашып жаткан кошунасы Толкун Самудинова кызыл китепти мыйзамсыз алганы тууралуу президенттин администрациядан кабарлашкан.
“Мен төрт балам менен убактылуу батирде туруп жатам, ал жака өкмөттөн киргизишкен. Бүгүн үйүм турган жерге чакырып, мен жерди мыйзамдуу алганымды айтышты. Бүгүн, 8-марттан баштап эски үйдүн урандыларын тазалап, ордуна жаңы там тургузуу иштери башталды. Мен буга чейин тилкемди жер мунапысына ылайык менчиктештирүүнү көздөп документтеримди топтогон элем. Элге, жалпыга маалымдоо каражаттарына ыраазымын”,-деди Шаболотова.
Шаболотованын үйү соттун чечими менен 1-мартта буздурулган. Көп өтпөй 3-мартта конуштун айрым тургундары чогулуп, бийликтен адилет чечим чыгарылышын талап кылышкан. Бул окуядан кийин Ак-Ордого президент Садыр Жапаров барган.
Бул окуяда чыр чыгарды деген негизде Новопавловка айылдык кеңешинин бир депутаты беш суткага камалган.
Жер мунапысы токтомун жетиштүүу деңгээлде аткарган жок деген себеп менен президенттин Чүй облусундагы ыйгарым укуктуу өкүлү, Сокулук жана аламүдүн райондорунун акимдери иштен алынган.
Жер мунапысы тууралуу өкмөттүн токтомундагы талаш-тартыштуу 27-пункту жоюлган.
Facebook шеринеси