Линктер

ЧУКУЛ КАБАР!
13-Июнь, 2024-жыл, бейшемби, Бишкек убактысы 05:02

Аксыда суу ташкыны каптаган үйлөр тазаланды


Кара-Камыш айыл аймагындагы Кара-Камыш айылы. Аксы, Жалал-Абад.
Кара-Камыш айыл аймагындагы Кара-Камыш айылы. Аксы, Жалал-Абад.

Жалал-Абад облусунун Аксы районунун Кара-Камыш айылында катталган кырсыктын кесепетин жоюуга тартылган күч-каражаттардын жардамында 56 турак үйдүн короо-жайы тазаланып бүттү. Бул тууралуу Өзгөчө кырдаалдар министрлиги (ӨКМ) кабарлады.

Аталган жердеги үйлөрдүн короолоруна, жер төлөсүнө жана ичине 26-майда суу ташкыны кирип, үч мал сарай урап калган. Буга байланыштуу райондун аймагында 26-майдан тарта өзгөчө кырдаал режими киргизилген.

Мындан сырткары ушул эле райондун Сары-Челек айыл өкмөтүнүн Аркыт айылындагы Кара-Жыгач – Сары-Челек авто жолунун болжол менен 2,5 чакырым аралыгы, Сарай-Сай сайынан түшкөн сел суулары сайдан ашып, 500 метр аралыкта ички чарбалык авто жолун каптаган. Мындагы суу жууп кеткен тилкелер калыбына келтирилип, жол каттамында унаалар тоскоолдуксуз өтүүдө.

Окуя болгон жерге өзгөчө кырдаалдар министринин орун басары Эделбек Кулматов барып, кооптуулукту алдын алуу үчүн тиешелүү тапшырмаларды койду.

Кыргызстанда быйылкы жаз жаанчыл болуп, бир катар облустарда, аймактарда сел жүрүп, дарыялар, суулар ташкындады. Селден улам апрелде Ош облусунда, Талас облусунун Талас районунда, Жалал-Абад облусунун Сузак районунда жана ушул эле облустун Ноокен районунун Момбеков айыл аймагында өзгөчө кырдаал режими киргизилген.

Кыргызстанда сел коркунучу июнь айынын ортосуна чейин сактала турганын өзгөчө кырдаалдар министри Бообек Ажикеев 15-майда Жогорку Кеңеште өлкө аймагында болуп жаткан табигый кырсыктардын кесепеттерин жоюу боюнча жүргүзүлүп жаткан иш-чаралар жөнүндө маалымат берип жатып билдирген. (ErN)

Facebook шеринеси

XS
SM
MD
LG