Линктер

ЧУКУЛ КАБАР!
16-Апрель, 2021 жума, Бишкек убактысы 13:33

Тажикстан: Жарандык согуш учурундагы "Кожо-колбашчы" 14 жылга кесилди


Хожо Каримовдун учурдагы жана жашыраак кези.

Тажикстанда 1990-жылдардагы жарандык согуш жылдарында «талаа колбашчысы» болгон учурда бир катар кылмыштарды жасаган деп айыпталган Хожо Каримов (Хӯҷа Каримов) 14 жылга күчөтүлгөн тартиптеги абакка кесилди. Бул өкүм 2021-жылы февралда эле чыгарылган, бирок 19-мартта гана өкүм тууралуу "Азаттык" үналгысына ачыкталган.

«Азаттыктын» тажик кызматынын кабарлашынча, 61 жаштагы Каримов адам өлтүрүү, талап-тоноо, кишилерди барымтага алуу доолору боюнча айыптуу деп табылган.

Тасма. «Азаттыктын» тажик кызматынын сот жүрүмү тууралуу тажикче кабары. 2021-жылдын 19-марты.

Хожо Каримов 1992--1997-жылдардагы жарандык согушка чейин Тажикстандагы медициналык институтта окуп, фельдшер болуп иштечү.

Жаңжал башталганда ал өкмөттүк күчтөрдү колдогон Элдик майдандын катарында Бириккен тажик оппозициясына каршы согушкан. Анын "Кожо-колбашчы" ("Хӯҷа-командир") деген ылакап аты болгон.

Ар кайсы маалыматка караганда, алааматтуу жарандык согушта 20 миңден 100 миңге чейин кишинин өмүрү кыйылган. Жаатташкан тараптар тынчтык келишимине Москвада кол коюшкан.

Каримов 1995-жылы тажик парламентинин депутаттыгына шайланып, кийин өлкөнүн Футбол Федерациясынын башчысы болгон.

Ал эки депутатты өлтүрүүгө айыпталып, 2001-жылы Малайзияга чыгып кеткен. Каримов 2019-жылы тажик аялдарын БАЭдеги тымызын сойку жайларына ташыган кылмыш ишине да шектүү катары доого кабылган.

2019-жылы жайында Каримов Интерполдун өтүнүчү боюнча Дубайда кармалып, 2020-жылы 17-февралда Тажикстанга өткөрүлүп берилген.

2021-жылы февралдын башында ал Тажикстан улуттук коопсуздук комитетине караштуу тергөө абагында жаткан кезинде бир түрмө кызматкерин сабап койгондугу да кабардалган.

Пикирлерди көрүңүз

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG