Линктер

ЧУКУЛ КАБАР!
27-ноябрь, 2020 жума, Бишкек убактысы 11:12

Чыныбай Турсунбеков оорунун айынан дүйнө салды


Чыныбай Турсунбеков

Кыргызстандын Жогорку Кеңешинин депутаты Чыныбай Акун уулу Турсунбеков 6-июлда түнгө маал өпкө кагыны илдетинин айынан каза болду.

Жогорку Кеңештин мурдагы төрагасы, парламенттеги КСДП фракциясынын мүчөсү, акын, илимпоз жана ишкер Чыныбай Акун уулу Турсунбеков 6-июлда түнгө маал өпкө кагыны илдетинен каза болгонун парламенттен ырасташты. Буга чейин Чыныбай Турсунбеков эки өпкөсү кагынып, Бишкектеги Улуттук госпиталда дарыланып жаткан. Акыркы күндөрдө анын абалы оор экени жана жасалма дем алдыруу аспабынын (ИВЛ) көмөгү менен дем алып жатканы айтылган.

5-июлда Жогорку Кеңештин басма сөз катчысы Ибраим Нуракун уулу Ч.Турсунбековдун кан басымы, дене табы жана жалпы акыбалы жакшы экенин, дарыгерлердин божомолунда ал жасалма дем алдыруучу аспаптан жакын арада чыгып, амбулатордук дарыланууга которулушу мүмкүн экенин кабарлаган. Ага пневмония деген диагноз коюлганын, бирок коронавируска тапшырган анализи таза чыкканын И.Нуракун уулу кошумчалаган.

Ч.Турсунбеков 2005- жана 2010-жылдардагы элдик ыңкылаптарды жандуу колдогон, Кыргызстанда либералдык реформаларды, базар экономикасынын, эркин басма сөздүн өнүктүрүлүшүнө тилектеш болгон коомдук ишмер эле.

2015-2016-жылдары Жогорку Кеңештин төрагасынын кызматын аркалаган. Парламенттин V жана VI чакырылыштарынын депутаты болуп шайланган.

Ал 2017-жылы президенттик үчүн атаандаш талапкер катары ат салышууга камынган, бирок ал кездеги президент Алмазбек Атамбаевдин жана КСДП партиясынын жетекчилигинин кысымынан улам бул оюнан баш тартууга аргасыз болгон.

"Азаттыктын" архиви: Турсунбеков: Атамбаевге жолуктум...
Турсунбеков: Атамбаевге жолуктум...
please wait

No media source currently available

0:00 0:25:11 0:00

2003-жылы ал Кыргыз Республикасынын президентинин жарлыгына ылайык эгемен Кыргызстандагы экономиканы өнүктүрүүгө өзгөчө сиңирген эмгеги үчүн “Даңк” медалы менен сыйланган.

"Азаттыктын" архиви: Турсунбеков: Түркияда алаканын жаңы барагын ачалы дешти
"Түркияда алакалардын жаңы барагын ачалы дешти"
please wait

No media source currently available

0:00 0:29:49 0:00

Чыныбай Акун уулу Турсунбеков 1960-жылы 15-октябрда Кыргызстандын Нарын облусуна караштуу Нарын районунун Жан-Булак айылында туулган.

1983-жылы Кыргыз мамлекеттик университетинин (азыркы Жусуп Баласагын атындагы КУУнун) кыргыз филология жана журналистика факультетин, 2002-жылы Бишкек шаарындагы Дипломатиялык академияны артыкчылык дипломдору менен аяктаган.

1983-1985-жж. ал «Кыргызстан» басмасынын саясий адабияттар редакциясында редактор, улук редактор болуп иштеген.

1985-1988-жж. ал Кыргыз улуттук илимдер академиясынын аспирантурасында окуп, 1988-жылы филология илимдери жаатында кандидаттык диссертациясын ийгиликтүү жактаган.

1989-1992-жж. ал Кыргыз мамлекеттик улуттук университетинин (азыркы Жусуп Баласагын атындагы КУУнун) кыргыз филологиясы жана журналистика факультетинде окутуучу, ага окутуучу, декандын орун басары болгон.

1993-1994-жж. Кыргыз Республикасынын Билим берүү министрлигинин Түркиядагы өкүлү, 1995-1997-жж. ТИКА кызматкери, «Манас-1000» Мамлекеттик комитетине караштуу Түркиядагы «Манас дастаны» филиалынын директору болуп иштеген.

1993-1996-жж. ал «Азаттык» үналгысынын Түркия боюнча сырт кабарчысы да болуп, кыргыз-түрк алакалары, Түркиядагы кыргыз диаспорасы тууралуу берүүлөрдү ырааттуу обого чыгарган.

1997-жылы ал Кыргызстанга кайтып келип, «Акун» фирмасын негиздеген. Ошондон баштап «Акун» фирмалар тобун жетектеп турду.

Ал Кыргызстан ишкерлер союзунун президенти, Кыргыз-түрк ишкерлер кеңешинин теңтөрагасы коомдук кызматтарын да аркалады.

Ал ыр жыйнактарын жарыялаган. Андан тышкары ал орус тилинен Николай Рубцовдун, түрк тилинен Осман Түркайдын айрым ырларын, түрк жазуучусу Нихал Атсыздын «Көкжалдардын өлүмү» романын, ошондой эле Түрк Тил курумунун тапшырмасы менен «Түрк дүйнөсүнүн адабияты» деген аталыштагы эки томдукту кыргыз тилине которгон.

Жылдыздуу жээк, жакынбы же алыспы?

2014-жылы “Жалын тоо” ыр жыйнагы жарык көргөн. Үч бөлүктөн турган китепке акындын буга чейин жарык көргөн эки ыр жыйнагынан алынган ырлары да кирген.

Ч.Турсунбеков бир катар акын-жазуучуларга жана башка айдыңдарга чыгармачылыгын колдоо үчүн демөөрчүлүк кылып келгени, ЖОЖдордун профессорлоруна, окумуштууларына Ысык-Көлдөгү "Акун" эс алуу жайында жайкысын эс алууга ар жыл сайын шарт түзгөндүгү маалым.

"Азаттык" үналгысынын жамааты коомдук ишмер, мурдагы кесиптешибиз Чыныбай Турсунбековдун үй-бүлөсүнө жана жакындарына терең кайгыруу менен көңүл айтат.

"Азаттыктын" материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.

Пикирлерди көрүңүз (20)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG