Линктер

ЧУКУЛ КАБАР!
15-Июль, 2024-жыл, дүйшөмбү, Бишкек убактысы 23:42

Орусия армия тууралуу фейк тараткандарды жазалайт


Орусиянын Мамлекеттик Думасы.
Орусиянын Мамлекеттик Думасы.

Орусиянын Мамлекеттик Думасы 4-мартта бир добуштан "Орус армиясы тууралуу фейк маалыматтар" боюнча мыйзамга толуктоолорду кабыл алды.

Кылмыш-жазык кодексине кирген жаңы берене боюнча орус армиясы тууралуу жалган же бурмаланган маалыматтарды тараткандар 15 жылга чейин эркинен ажыратылышы мүмкүн. Ал эми кээ бир басылмалардын жана социалдык тармактардын сайттары бөгөттөлүп, ачылбай калды.

Орусиянын Мамлекеттик Думасы "орус армиясы жөнүндө фейк маалыматтарды таратуу" тууралуу мыйзамга толуктоо киргизип, бул мыйзам долбоору ыкчам тартипте каралып, экинчи жана үчүнчү окууда катары менен кабыл алынды.

Мамлекеттик Думанын бул мыйзамына орус армиясынын азыркы абалы тууралуу фейк маалыматтарды тараткандарды 15 жылга чейин эркинен ажыратып, жазалоо киргизилди.

Бул тууралуу “Интерфакс” маалымат агенттиги кабарлады.

"Маалымат согушундагы зарылчылык"

"Мыйзам долбоору тез арада Федералдык Кеңештин кароосуна жөнөтүлөт", - деп билдирди Мамлекеттик Думанын төрагасы Вячеслав Володин.

Эреже боюнча долбоор парламенттин төмөнкү палатасы болгон Мамдумадан өткөн соң, аны жогорку палата - Федералдык Кеңеш бекитет.

Мыйзамга киргизилген жоболор ыкчам тартипте каралып, эртеңден баштап күчүнө кириши мүмкүн экени айтылды.

Мамлекеттик Думанын төрагасы Вячеслав Володин Украинадагы аскердик операция маалында Орусияга каршы маалымат согушу күчөгөнүн айтып, жаңыдан кирген жоболор ага каршы чаралар экенин жашырган жок.

Вячеслав Володин, Орусиянын Мамлекеттик Думасынын төрагасы.
Вячеслав Володин, Орусиянын Мамлекеттик Думасынын төрагасы.

"Эгерде атайын, аскердик, тынчтыкты сактоочу операция учурунда мамлекетке зыян келтирген ар кандай имиштер жана жалган маалыматтар тарап жаткан болсо, аны тараткандар жоопкерчилик өтө оор болорун түшүнүшү керек. Биздин кесиптештер бул жоопкерчиликти 15 жылга чейин эркинен ажыратууну сунуштап жатышат".

Фейктер үчүн жаза чаралары

Мамлекеттик Думанын 401 депутаты "Орус армиясы тууралуу фейктерди таратууга каршы" мыйзамды бир добуштан колдоп берди. Кабыл алынган чечимге ылайык, Орусиянын Кылмыш-жазык кодексине жаңыдан берене киргизилди.

Ал "Орусиянын жана анын жарандарынын кызыкчылыктарын коргоо максатында, Куралдуу күчтөрдү колдонуу жөнүндө атайлап жалган маалыматтарды коомчулукка таратуу тууралуу" деп аталат.

Мыйзам бузгандарга 5 миллион рублга чейин айып пул салынат же 10 жылга чейин соттолот. Ал эми таратылган фейктер мамлекетти оор кесепеттерге алып келсе, 15 жылга чейин эркинен ажыратуу каралган.

Мындан сырткары Мамлекеттик Дума Орусияга каршы эл аралык санкцияларды киргизүүгө чакырык жасагандарды үч жылга чейин эркинен ажыратууну караган мыйзам жобосун да кабыл алды.

Бул үчүн 500 миң рублга чейин акчалай айып салуу, эркиндигин чектөө, же 200 миң рублга чейин айып салуу менен кошо үч жылга чейин эркинен ажыратуу жазасы колдонулат.

Зеленский Кремлди жалган пропагандага айыптады

3-мартта Киевдеги маалымат жыйынында Украинанын президенти Владимир Зеленский "тескерисинче, Кремл өзү баскынчылыгын актоо үчүн жалган идеологиялык пропаганда менен алектенип, украин элин чөгөлөтүү үчүн анын эгемендигине кол салып жатканын" билдирди.

Владимир Зеленский, Украинанын президенти.
Владимир Зеленский, Украинанын президенти.

"Кайсы бир нерселер бар, кандайдыр бир мунаса тапса боло турган. Ошентип келишип, адам өлүмүн токтото турган. Бирок эч качан келишпей турган да маселелер бар. Алар боюнча мунаса табууга деги эле мүмкүн эмес. Биз жөн эле келип туруп, "макул, бул сенин өлкөң, Украина Орусиянын бир бөлүгү” деп эле артка чегинүүгө мүмкүн эмес. Анда эмнеге бизге муну сунуштап жатышат, ушул эми туурабы?".

Ал эми эл аралык Globalcheck уюмунун маалыматына караганда, Meduza, BBC орус кызматы, радио Свобода, DW- “Немис толкуну” медиаларынын маалымат сайттары бөгөттөлдү.

Ошондой эле Facebook, Twitter сыяктуу социалдык тармактары Орусиядагы көпчүлүк мобилдик операторлордун колдонуучулары үчүн ачылбай калды.

Facebook шеринеси

XS
SM
MD
LG